መንበረ ፓትርያርክ ቅድስተ ቅዱሳን ማርያም ገዳም

የምዕራብና የደቡብ አዲስ አበባ አህጉረ ስብከት ሊቀ ጳጳስ

ገነተ ጽጌ ቅ/ጊዮርጊስ

የምዕራብና የደቡብ አዲስ አበባ አህጉረ ስብከት ሊቀ ጳጳስ

ቦሌ ደብረ ሳሌም መድኃኔዓለም

የምዕራብና የደቡብ አዲስ አበባ አህጉረ ስብከት ሊቀ ጳጳስ

መንበረ ጸባዖት ቅድስት ስላሴ ካቴድራል

የምዕራብና የደቡብ አዲስ አበባ አህጉረ ስብከት ሊቀ ጳጳስ

ርዕሰ አድባራት መንበረ ፀሐይ እንጦጦ ማርያም

የምዕራብና የደቡብ አዲስ አበባ አህጉረ ስብከት ሊቀ ጳጳስ

ምስካየ ኅዙናን መድኃኔኃለም ገዳም

የምዕራብና የደቡብ አዲስ አበባ አህጉረ ስብከት ሊቀ ጳጳስ

ታዕካ ነገሥት በዓታ ለማርያም

የምዕራብና የደቡብ አዲስ አበባ አህጉረ ስብከት ሊቀ ጳጳስ

ደብረ ጽጌ ቅድስ ኡራኤል

የምዕራብና የደቡብ አዲስ አበባ አህጉረ ስብከት ሊቀ ጳጳስ

መንበረ መንግሥት ቅ/ገብርኤል ገዳም

የምዕራብና የደቡብ አዲስ አበባ አህጉረ ስብከት ሊቀ ጳጳስ

ደብረ ኃይል ራጉኤል

የምዕራብና የደቡብ አዲስ አበባ አህጉረ ስብከት ሊቀ ጳጳስ

http://www.addisababa.eotc.org.et/site/components/com_gk2_photoslide/images/thumbm/590538kidste_mariam.jpg http://www.addisababa.eotc.org.et/site/components/com_gk2_photoslide/images/thumbm/895720giorgis.jpg http://www.addisababa.eotc.org.et/site/components/com_gk2_photoslide/images/thumbm/903816bole_medhaniealem.jpg http://www.addisababa.eotc.org.et/site/components/com_gk2_photoslide/images/thumbm/683566trinity.jpg http://www.addisababa.eotc.org.et/site/components/com_gk2_photoslide/images/thumbm/821897entoto_mariam.jpg http://www.addisababa.eotc.org.et/site/components/com_gk2_photoslide/images/thumbm/310283meskaye_1.jpg http://www.addisababa.eotc.org.et/site/components/com_gk2_photoslide/images/thumbm/904160BEATA_MARIAM.jpg http://www.addisababa.eotc.org.et/site/components/com_gk2_photoslide/images/thumbm/578084urael.jpg http://www.addisababa.eotc.org.et/site/components/com_gk2_photoslide/images/thumbm/812647gebrie_gedam.jpg http://www.addisababa.eotc.org.et/site/components/com_gk2_photoslide/images/thumbm/681179raguel.jpg
ብፁዕ ወቅዱስ አቡነ ማትያስ ቀዳማዊ ፓትርያርክ የ2009 ዓ.ም የልደት በዓልን አስመልክተው መልእክት አስተላለፉ

pp009

ቃለ በረከት  ዘብፁዕ ወቅዱስ አቡነ ማትያስ ቀዳማዊ ፓትርያርክ ርእሰ ሊቃነ ጳጳሳት ዘኢትዮጵያ ሊቀ ጳጳስ ዘአኵስም ወዕጨጌ ዘመንበረ ተክለ ሃይማኖት
ዘተናገረ በእንተ በዓለ ልደቱ ለእግዚእነ ወአምላክነ ወመድኃኒነ ኢየሱስ ክርስቶስ ሎቱ ስብሐት!!
በስመ አብ ወወልድ ወመንፈስ ቅዱስ አሐዱ አምላክ አሜን!!
-በሀገራችን በኢትዮጵያ በገጠርና በከተማ የምትኖሩ፤
-ከሀገር ውጭ በተለያዩ አህጉር የምትገኙ፤
-የሀገራችንን ዳር ድንበር ለመጠበቅና ለማስከበር በየጠረፉ የቆማችሁ፤
-በሕመም ምክንያት በየፀበሉና በየሆስፒታሉ ያላችሁ፤
-እንዲሁም የሕግ ታራሚዎች ሆናችሁ በየማረሚያ ቤቱ የምትገኙ ኢትዮጵያውያንና ኢትዮጵያውያት፤
 እኛን ለማዳን በለበሰው ሥጋ በቤተ ልሔም ተወልዶ በመካከላችን የተገኘው፣ በመለኮታዊ ባህርዩ የማይወሰነው አካላዊ ቃል እግዚአብሔር ወልድ ጌታችን አምላካችንና መድኃኒታችን ኢየሱስ ክርስቶስ እንኳን ለሁለት ሺሕ ዘጠኝ ዓመተ ምሕረት በዓለ ልደቱ በሰላም አደረሳችሁ!!
“ወበዘርዕከ ይትባረኩ ኵሎሙ አሕዛበ ምድር፤ የምድር አሕዛብ ሁሉ በዘርህ ይባረካሉ” ፤(ዘፍ 22፤18)፡፡
በሁሉም ዘንድ እንደሚታወቀው በረከት የመልካም ነገር ሁሉ ምንጭ ነው፤ እግዚአብሔር በጥንተ ፍጥረት ለሰው ልጅ የሰጠው የመጀመሪያው ጸጋ ብዝኃ በረከት ነው ፡፡ ቅዱስ መጽሐፍ ይህንን አስመልክቶ እንዲህ ይላል “እግዚአብሔርም ባረካቸው፤ እንዲህም አላቸው፤ ብዙ ተባዙ ምድርንም ሙሉአት፤ ግዙአትም፤ የባህርን ዓሣዎችና የሰማይን ወፎች በምድር ላይ የሚንቀሳቀሱትንም ሁሉ ግዙአቸው” ይላል፤ (ዘፍ 1፤28)፡፡
ለሰው የተሰጠው በረከት በኃጢአት ምክንያት መሰናክል ቢገጥመውም፣ እግዚአብሔር በፍጡሩ ጨርሶ አይጨክንምና ሙሉና ፍጹም የሆነው በረከት እንደገና ተመልሶ ለሰው ልጅ እንዴት እንደሚሰጥ ለበረከት በጠራቸውና በመረጣቸው ቅዱሳን አበው አማካይነት ሲያስታውቅ ኖሮአል፡፡
በተለይም የበረከት አባት ተብሎ በሚታወቀው በአብርሃም ዘር በኩል መጻኢው በረከት እውን እንደሚሆን “በዘርህ የምድር አሕዛብ ሁሉ ይባረካሉ” ተብሎ በእግዚአብሔር አንደበት በማያሻማ ሁኔታ ተነግሮ ነበር፡፡
ከእውነተኛው በረከት ተራቁታ የቆየችው ዓለመ - ሰብእ፣ እግዚአብሔር በራሱ ቃል የገባላት ዘላቂውና እውነተኛው በረከት እስኪመለስላት ድረስ ለአምስት ሺሕ አምስት መቶ ዓመታት በተስፋ ስትጠባበቅ ቆይታለች፡፡
የተናገረውን የማያስቀር እግዚአብሔር በረከቱን ለሕዝቡ የሚያድልበት ጊዜ ሲደርስ ቅዱስ መንፈሱን ባሳደረባት ቅድስት እናት በኤልሳቤጥ አንደበት የበረከቱ ሙዳይ ቅድስት ድንግል ማርያም፣ በረከቱ ኢየሱስ ክርስቶስ መሆኑንና በረከቱን ለምድር አሕዛብ ሁሉ ሊያድል እንደመጣ “ከሴቶች ሁሉ ተለይተሸ አንቺ የተባረክሽ ነሽ የማኅፀንሽ  ፍሬም የተባረከ ነው” ሲል የምሥራቹን ለዓለም አሰማ፤(ሉቃ 1፡41-43)፡፡
ቀዳማዊ የሆነ እግዚአብሔር ወልድ በድንግል ማርያም ማኅፀን ውስጥ ዘጠኝ ወር ከአምስት ቀን በፅንስ ቆይቶ የዛሬ ሁለት ሺሕ ዘጠኝ ዓመተ ምሕረት ታሕሣሥ ሃያ ዘጠኝ ቀን በቤተ ልሔም ተወለደ ጌታችን በተወለደ ጊዜ የሰማይ ሠራዊት ማለትም መላእክትና የመላእክት አለቆች  “ወናሁ ተወልደ ለክሙ መድኅን ዘውእቱ እግዚእ ቡሩክ፤ እነሆ መድኅን ተወልዶላችኋል፤ ይኸውም ቡሩክ የሆነ ጌታ ነው” በማለት የሕጻኑን ማንነት ከገለጹ በኋላ “በሰማያት ለእግዚአብሔር ክብር ይሁን፤ በምድርም ሰላም ይሁን፤ ለሰውም በጎ ፈቃዱ ይደረግለት” እያሉ  የተወለደው ሕጻን ለሰው ልጅ የሚያስገኘውን ሰላምና መልካም በረከት በመግለጽ ደስታቸውን በቃለ መዝሙር በቤተ ልሔም ዙሪያ አስተጋብተዋል፡፡
ከሰው ወገንም ቅድስት ድንግል ማርያም፣ ከእርስዋ ጋር የነበሩ ወገኖች፣ እንደዚሁም በአካባቢው የነበሩ  የከብት እረኞች  በመላእክት የምስጋና መዝሙር ተሳታፊዎች ነበሩ፤  (ሉቃ 2፤8-20)፡፡
እንግዲህ ከጥንት ጀምሮ በአበው ሲነገርና ሲጠበቅ የነበረው የበረከት ተስፋ በቃልም፣ በመልእክትም፣ በሐሳብም፣ በምሥጢርም ተፋልሶ ሳያጋጥመው፣ ከላይ ጀምሮ እስከ ታች ፍሰቱና ምሥጢሩ ተጠብቆ በተነገረው መሠረት ተፈጽሞ መገኘቱ፣ የክርስትና ሃይማኖት ምን ያህል አምላካዊ የሆነ ጽኑ መሠረት እንዳለው ያረጋግጣል ፡፡
የክርስትና ሃይማኖት መሠረቱ “ባርኮ እባርከከ፤ መባረክን እባርክሃለሁ” ከሚል ተነሥቶ፣ “የአባቴ ቡሩካን መንግሥተ ሰማያትን ትወርሱ ዘንድ ወደኔ ኑ!” በሚል የሚጠናቀቅ፣ መነሻውና መድረሻው በረከት የሆነ ሃይማኖት ነው፡፡
የክርስትና ሃይማኖት “ለሰላሙም ፍጻሜ የለውም” ከሚል ተነሥቶ “በምድርም ሰላም ይሁን” በሚል ተንደርድሮ፣ በምስጋና፣ በክብርና በሰላም፣ በማያልፍም ሕይወት ዘላለማዊነቱን የሚያውጅ ሃይማኖት ነው፡፡
የተወደዳችሁ የመንፈስ ቅዱስ ልጆቻችን ምእመናንና ምእመናት
መድኃኒታችን ኢየሱስ ክርስቶስ በተወለደበት ዕለት ከወደላይ የተላለፈው ዓቢይ መልእክት ሰላምና በረከት በምድር ላይ ሆነ የሚል እንደሆነ ማስተዋል አለብን ፡፡
ታላቁ ሊቅና ኢትዮጵያዊው አባት ቅዱስ ያሬድ ስለዚህ በረከት ሲናገር “ በእንተ ልደቱ ለክርስቶስ አድባር ኮኑ ኅብስተ ሕይወት፤ወዕፀወ ገዳምኒ ፈረዩ አስካለ በረከት፤ ወማየ ባህርኒ ኮነት ሐሊበ ወመዓረ፤ ማለትም ክርስቶስ በተወለደ ጊዜ ተራሮች የሕይወት እንጀራ ሆኑ፤የበረሀ ዛፎችም የበረከት እሸትን አፈሩ ፤የባህር ውሀም ወተትና ማር ሆነች” ይላል፡፡
የቅዱስ ያሬድ ቃለ ዝማሬ ሕያዋኑም ግኡዛኑም ሁሉ በልደተ ክርስቶስ ምክንያት በበረከት እንደ ተንበሸበሹ  ይመሰክራል፡፡
ከዚህ አኳያ በበዓለ ልደተ ክርስቶስ የሚበላ እንጀራና  የሚጠጣ ውሃ አጥቶ በረኃብና በጥም ተጐሳቊሎ የዋለ አልነበረም ብቻ ሳይሆን፤ እንጀራውም ወተቱም ማሩም ፍጥረቱ ሁሉ እንደ ፈለገው እየተመገበ በሰላምና በደስታ ቀኑን ሁሉ ማሳለፉን እንገነዘባለን ፡፡
የልደተ ክርስቶስ በረከት ገደብ የለሽ መሆኑን ያወቅን የኢየሱስ ክርስቶስ ተከታዮች ነን የምንል ክርስቲያኖች በዚህ ቀን ርቦትና ጠምቶት፣ አዝኖና ተክዞ የሚውል ሰው እንዳይኖር ያለውን በማካፈልና በጋራ በመመገብ የታረዘውን በማልበስ የታመመውን በመጠየቅ የበዓሉን ሃይማኖታዊና ሥነ ምግባራዊ ገጽታ መጠበቅና ማስጠበቅ ይኖርብናል፡፡
በዓለ ልደተ ክርስቶስ የበረከት ቀን ከመሆኑም ሌላ የዕርቅ፣ የእኩልነትና የአንድነት በዓልም ነው፡፡ ከብዙ ጊዜ መለያየትና መራራቅ በኋላ፣ ፈጣሪ የሰዎችን ሥጋ አካሉ አድርጎ በሰዎች መካከል በአካል መገኘት ከዕርቅ ሁሉ የበለጠ ዕርቅ መሆኑን መዘንጋት የለበትም ፡፡
በዕለተ ልደተ ክርስቶስ መላእክትና ሰዎች ፈጣሪያቸው በተወለደበት ዙሪያ ተሰባስበው በእኩልነትና በአንድነት ሲዘምሩና ሲያመሰግኑ ማየትና መስማትም የፍጡራንን እኩልነትና አንድነት ያረጋገጠ ሌላው ክሥተት ነበረ፡፡
ሰማያውያንና ምድራውያን ለሰው ልጅ ህልውና ወሳኝ የሆነውን ‹‹ ሰላም በምድር ይሁን›› እያሉ በአንድ ቃል መዘመራቸውም ለሰማያውያኑም ሆነ ለምድራውያኑ ከሰላም የበለጠ ትልቅ ጸጋ የሌለ መሆኑ የሚያስገነዝብ ነበረ፡፡
እንዲህም ስለሆነ ከልደተ ክርስቶስ ያልተማርነው ትምርት የለም ማለት ይቻላል፤  እግዚአብሔር በልደተ ክርስቶስ ዕለት ያስተማረን ብቻ አጥብቀን ብንይዝና ይህንኑ ብንፈጽም ከበቂ በላይ ነው ቢባል ፍጹም እውነት ነው፡፡
 ተራራው ሁሉ የሕይወት እንጀራ ሆነ ፤የበረሀ ዛፍ ሁሉ የበረከት እሸት ሆነ፤የባህር ውሃም ማርና ወተት ሆነች ተብሎ ሲነገር በዓለ ልደተ ክርስቶስ የልማት፣ የዕድገትና፣ የብልፅግና አስተማሪ መሆኑን ያስገነዝባል ፡፡
ከዚህ አንጻር ዛሬም ቤተ ክርስቲያን የምታስተምረው ተራራው ይልማ፣በረሀው በደን ይሸፈን፣ ውሃው ከብክለት ድኖ ለምግብነት የሚያገለግሉ ሕይወታውያን ፍጡራን በብዛት ይኑሩበት የሚለው በልማትና በበረከት የተሞላው የልደተ ክርስቶስ አስተምህሮ ነው፤ ሕዝበ ክርስቲያኑ ይህንን አምላካዊ አስተምህሮ በምልአት ተቀብሎ ወደ ልማት ከተሠማራ በዚያው መጠን በረከቱን በገፍ ያፍሳል፡፡
ከዚህም ጋር “የሺሕ ፍልጥ ማሠሪያው ልጥ›› እንደሚባለው የሁሉም ማሠሪያ ሰላም ስለሆነ የድሮ ነጋዴ ለንግድ ሲወጣ ስንቁን በትከሻው ተሸክሞ እንደሚጓዝ ሁሉ፣ዛሬም የልማት ነጋዴ ሕዝባችን ሰላምን በልቡ ቋጥሮ መጓዝ ይኖርበታል፡፡
ሁሉም ችግሮች ከሰላም በታች መሆናቸውን ሁሉም ማኅበረሰባችን መገንዘብ አለበት፤ ሁሉም ለአንድነት፣ ለእኩልነት፣ ለፍትሕ፣ ለወንድማማችነት፣ ለመተማመንና ለመከባበር መስፈን የማያወላውል አቋም ሊይዝ ይገባል፡፡
የቀደሙት አባቶቻችን ኢትዮጵያን ታላቅ ሀገር እንድትሆን ያበቋት አንድነታቸውን ጠብቀው በጋራ ስለሠሩ ነው፤ያለ አንድነት ታላቅነትም፣ ኃያልነትም፣ ልማትና ዕድገትም፣ ፈጽሞ እንደማይገኝ ሳይታለም የተፈታ ነውና ሕዝባችን ይህንን በውል ማጤን ይኖርበታል፡፡
በመጨረሻም
ከላይ ለመግለፅ እንደተሞከረው የክርስቶስ መወለድ ዋና ዓላማ መለያየትና መቃቃርን፣ መነታረክንና፣ በጥላቻ ዓይን መተያየትን አስወግዶ በምትኩ ዕርቅን፣ ዘላቂ ሰላምና አንድነትን በሰው ሁሉ አእምሮ ውስጥ ማስፈን እንደሆነ እናውቃለን ፡፡
በመሆኑም ይህ ነገረ ሕይወት ከተሰበከባቸው የዓለማችን ሀገራት ኢትዮጵያ ቀዳሚዋ ሀገር እንደመሆኗ መጠን፣ በእግዚአብሔር ከተሰጣት የቅድሚያ ኃላፊነት አንጻር በሀገር ውስጥ ብቻ ሳይሆን በዓለም አቀፍ ደረጃም ሁሉ፣ እንደ ድሮው ደማቁ የአንድነት ታሪኳና ተደናቂው ሥልጣኔዋ፣ እንደዚሁም ጽኑ ሰላምዋና ልማቷ ጠብቃ በማስጠበቅ አስተማሪነትዋ ጎልቶ እንዲወጣ “ችግሮች ሁሉ ከሰላም በታች ናቸው” የሚለውን ጠንካራ የሰላም አስተሳሰብ መርሕ በማድረግ ሁሉም በአንድነት፣ በኃላፊነት፣ በቅንነትና በተቈርቋሪነት ሀገሩን እንዲጠብቅና እንዲያለማ  መልእክታችንን በእግዚአብሔር ስም እናስተላልፋለን፡፡
መልካም የልደት በዓል ያድርግልን
እግዚአብሔር ኢትዮጵያንና ሕዝባችንን ይባርክልን
ወስብሐት ለእግዚአብሔር
አሜን
አባ ማትያስ ቀዳማዊ
ፓትርያርክ ርእሰ ሊቃነ ጳጳሳት ዘኢትዮጵያ
ሊቀ ጳጳስ ዘአክሱም ወእጨጌ ዘመንበረ ተክለ ሃይማኖት፤
ታሕሣሥ 2009ዓ.ም
አዲስ አበባ ኢትዮጵያ

 
“የምናመልከው አምላካችን ከሚነደው ከእሳቱ እቶን ያድነን ዘንድ ይችላል”

1

ከ605 እስከ 562 ዓመተ ዓለም በባቢሎን የነገሠው ናቡከደነጾር ቁመቱ ስድሳ ክንድ፣ወርዱም ስድስት ክንድ የሆነውን የወርቁን ምስል አሠራ፤
በባቢሎንም አውራጃ በዱራ ሜዳ አቆመው፤ ንጉሥ ናቡከደነጾር መኳንንትንና ሹማምንቶችን፣ አዛዦችንና አዛውንቶችን፣ በጅሮንዶችንና አማካሪዎችን፣ መጋቢዎችንም፣አውራጃ ገዢዎችንም ሁሉ ይሰበሰቡ ዘንድ ንጉሡም ናቡነከደነጾር ላቆመው ምስል ምረቃ ይመጡ ዘንድ ላከ፡፡
በዚያን ጊዜም መኳንንቱና ሹማምንቱ አዛዦቹና አዛውንቶቹ በጅሮንዶቹና አማካሪዎቹ መጋቢዎቹና አውራጃ ገዢዎቹ ሁሉ ንጉሡ ናቡከደነጾር ላቆመው ምሥል ምረቃ ተሰበሰቡ ፡፡ ናቡከደነጾርም ባቆመው ምስል ፊት ቆሙ፤ አዋጅ ነጋሪውም እየጮኽ እንዲህ አለ፡፡ ወገኖችና አህዛብ በልዩ ልዩ ቋንቋም የምትናገሩ ሆይ የመለከትን፣ የእንቢልታን፣ የመሰንቆንና የክራርን፣የበገናንና የዋሽንትን፣ የዘፈንንም ሁሉ ድምፅ በሰማችሁ ጊዜ ተደፍታችሁ ንጉሡ ናቡከደነጾር ላቆመው ለወርቁ ምስልም እንድትሰግዱ ታዛችኋል፤ ተደፍቶ የማይሰግድ በዚያን ጊዜ በሚነድ እሳት አቶን ውስጥ ይጣላል የሚል አዋጅ የታወጀ በመሆኑ በአዋጁ መሠረት የበገናውንና  የዘፈኑን ሁሉ ድምጽ የሚሰሙ አህዛብና በልዩ ልዩ ቋንቋ የሚናገሩ ወገኖች ጉንሥ ናቡከደነጾር ላቆመው የወርቅ ምስል ሰገዱ፡፡ በዚያን ጊዜ ግን ሲድራቅ፣ሚሳቅ፣አብድናጎ የሚባሉ ሶስት አይሁዳውያን ወጣቶች ናቡከደነጾር ላቆመው የወርቅ ምስል አንሰግድም በማለታቸው ተከሰው ለፍርድ ቅጣት ቀረቡ፡፡ 
   ንጉሥ ናቡከነደጾርም በብስጭትና በቁጣ፣ ሲድራቅን፣ሚሳቅን እና አብድናጎን ወደ እርሱ ያመጡአቸው ዘንድ አዘዘ፡፡
 ካመጡአቸውም በኋላ ለወርቁ ምስል አለመስገዳችሁ እውነት ነውን ብሎ ጠየቃቸው፡፡ ወጣቶቹም ለምስሉ እንደማይሰግዱ አረጋገጡለት፡፡ 
ንጉሡም በሚነድ እሳት ትጣላላችሁ ከእጄስ የሚአድናችሁ አምላክ ማን ነው ብሎ ተናገራቸው፡፡
ሲድራቅ ፣ሚሳቅ ፣አብድናጎም የምናመልከው አምላካችን ከሚነደው ከእሳቱ አቶን ያድነን ዘንድ ይችላል፤ከእጅህም ያድነናል፡፡ እርሱ ባያድነን አማልክትህን እንዳናመልክ ላቆምከውም ለወርቁ ምስል እንደማንሰግድ እወቅ አሉት፡፡ በዚያን ጊዜ ንጉሥ ናቡከደነጾር ተቆጥቶ ሲደራቅን ሚሳቅን አብድናጎን አስረው ወደ እሳቱ እቶን ይጥሏቸው ዘንድ ኃያላኑን አዘዘ፡፡
 በዚያን ጊዜም 3ቱም ወጣቶች ከልብሳቸው ጋር በሚነደው የእሳት እቶን ውስጥ ተጣሉ፡፡
ንጉሥ ናቡከደነጾር የ3ቱን ወጣቶች ሁኔታ ለማየት ውደ እሳቱ እቶን በቀረበበት ወቅት ወጣቶቹ እሳቱ ሳያቃጥላቸው ከመልአኩ ጋር በእሳቱ መካከል ሲመላለሱ በማየቱ መልአኩን የላከ ፣ ከአምላካቸውም በቀር ማንንም አምላክ እንዳያስመልኩና እንዳይሰግዱ ሰውነታቸውን አሳልፈው የሰጡትን የንጉሡንም ቃል የተላለፉትን በእርሱ የታመኑት ባሪያዎቹን ያዳነ የሲድራቅና የሚሳቅ የአብድናጎም አምላክ ይባረክ በማለት ንጉሥ ናቡከደነጾር 3ቱን ወጣቶች በባቢሎን አውራጃ ውስጥ ከፍ ከፍ አድርጋቸው (ዳን3፤1-30)
ንጉሥ ናቡከደነጾርም “መንግሥቱ ዘለዓለም ወምኩናኑኒ ለትውልደ ትውልድ” መንግሥቱ የዘለዓለም መንግሥት ነው ግዛቱም ለልጅ ልጅ ነው በማለት የእግዚአብሔርን ታላቅነት አደነቀ (ዳን4፤3)
ንጉሥ ናቡከደነጾር የወርቁን ምስል ያቆመበት ቦታ ልዩ ስሙ ዱራ ሜዳ በመባል የሚታወቅ ሲሆን የዱራ ሜዳ ከባቢሎን በስተደቡብ  ርቆ የሚገኝ እና የደንጊያ ክምር የበዛበት ቦታ ነው፡፡ በመጽሐፍ ቅዱስ ማብራሪያዎች ላይ በተገለጸው መሠረት የጣዎቱ መጠሪያ ስም ናቡ በመባል የተሰየመ ሲሆን ይኽውም የንጉስ ናቡከደነጾር ስም የመጀመሪያዎቹ ሁለት ፊደላት ናቸው፡፡ 3ቱ ወጣቶች ከንጉሡ ቃል ይልቅ ለእግዚአብሔር ቃል ታዘዙ፡፡ እግዚአብሔር ከሚደው የእሳት እቶን ይታደጋቸው ዘንድ ፈቃደኛ ቢሆንም ባይሆንም የእግዚአብሔርን ቃል ለመፈጸም በእምነታቸው ፀኑ፡፡ ናቡከደነጾር ከ3ቱ ወጣቶች ጋር 4ኛ ሆኖ በእሳቱ ውስጥ ሲመላለስ የነበረውን ሁሉን በሚችል የእስራኤል አምላክ የተላከ ነው ብሎ በማመን ያለማመንታት ተቀበለ፡፡ ይህ መልእክተኛ በኢትዮጵያ ኦርቶዶክስ ተዋሕዶ ቤተ ክርስቲያን አስተምህሮ መሠረት መልአከ ብሥራት ቅዱስ ገብርኤል ነው፡፡
 ለዚህም የሚቀርበው ማስረጃ በትንቢተ ዳንኤል መጽሐፍ ስሙ ተገልጿል፡፡ (ዳን8፤15) (ዳን፤21) በሌላ አገላለጽ “ገብርኤል ብሒል ብእሲ ወአምላክ” ገብርኤል ማለት ሰውና አምላክ ማለት ነው ተብሎ ስለሚተረጎም “ወራብኡሰ ይመስል ከመ ወልደ እግዚአብሔር”  አራተኛው የእግዚአብሔርን ልጅ ይመስላል በማለት የተገለጠው መልአከ ብሥራት ቅዱስ ገብርኤል መሆኑን በግብፅ ያሳያል፡፡ ከታሪኩ እንደምንረዳው የእግዚአብሔር መልአክ ዋና አገልግሎት እግዚአብሔርን ማመስገን (ኢሳ 6፤1) ቢሆንም አማኞችንም በማገልገል ይታወቃል(ዕብ 1፤14) ንስሐ በሚገባ ሰውም ደስ ይለዋል (ሉቃ 15፤10)
 እግዚአብሔርን የሚፈሩትን ሰዎችም ይጠብቃል (መዝ 34፤7) ኃጢአተኞችንም ይቀጣል፡፡ (ዘካ፤ 4)

(መምህር ሣህሉ አድማሱ)

 
“ይኩንኪ በከመ ተአመንኪ” (እንዳመንሽ ይሁንልሽ)

ይህ ቃል ጌታችን አምላካችን መድኃኒታችን ኢየሱስ ክርስቶስ ለከነናዊት ሴት የተናገረው ቃል ነው፡፡ ታሪኩም/በማቴዎስ ወንጌል ም. 15፡21-28/ ላይ ይገኛል፡፡ ታሪኩም እንደሚከተለው ነው፡፡
ጌታችን አምላካችን መድኃኒታችን ኢየሱስ ክርስቶስ ወደ ጢሮስና ወደ ሲዶና አገር ሄደ፡፡ በዚያም ከነናዊት ሴት ጌታ ሆይ! የዳዊት ልጅ ማረኝ ልጄን ጋኔን ክፉኛ ይዟታል ብላ ጮኸች፡፡ እርሱ ግን ለጊዜው አንዳች አልመለሰላትም፡፡ ደቀ መዛሙርቱም ወደ እርሱ ቀርበው በኋላችን ትጮኻለችና አሰናብታት እያሉ አማለዷት፡፡ እርሱም መልሶ ከእስራኤል ቤት ለጠፋት በጎች በቀር አልተላክሁም አለ፡፡ ይህም ማለት ትምህርት፣ መምህር አጥተው የተጎዱ እስራኤልን ላስተምር ሰው ሆኛለሁ ማለቱ ነው፡፡ እርሷ ግን ጌታ ሆይ፡- እርዳኝ እያለች ሰገደችለት፡፡ እርሱ ግን መልሶ የልጆችን እንጀራ ለውሾች መስጠት አይገባም አለ፡፡ እርስዋም አዎን ጌታ ሆይ፡- ውሾችም እኮ ከጌቶቻቸው ማዕድ የወደወቀውን ፍርፋሪ ይበላሉ አለች፡፡ የልጆችን እንጀራ ለውሾች መስጠት አይገባም ሲል የምስጢር ባለቤት መድኃኒታችን ኢየሱስ ክርስቶስ የተናገረውን ቃል አባቶቻችን ሊቃውንት ሲያመሰጥሩት ለእስራኤል የማደርገውን ተአምራት ለአሕዛብ አላደርገውም ማለት ነው፡፡ ይህች ከነናዊት ሴት ከአሕዛብ ወገን ናትና፡፡ እርሷም የሰጠችው መልስ ውሾችም እኮ ከጌቶቻቸው ማዕድ የወደቀውን ፍርፋሪ ይባላሉ፡፡ የዚህም ምስጢር ለእስራኤል ደጋጉን ተአምራት ብታደርግላቸው ለኔ ደግሞ ጥቃቅኑን ተአምራት አታደርግልኝም? ማለት ነው፡፡
በዚህን ጊዜ የምሕረት ባለቤት አምላካችን ኢየሱስ ክርስቶስ መልሶ አንቺ ሴት እምነትሽ ታላቅ ነው፡፡ “ይኩንኪ በከመ ተአመንኪ” (እንዳመንሽ ይሁንልሽ አላት) ከዚያች ሰዓት ጀምሮ ልጇ ዳነች፡፡
ሊቃውንት እንደሚያመሰጥሩት ይህች ከነናዊት ሴት ሶስት ነገሮችን ይዛ ስለተገኘች ልጇ ድናላታለች፡፡ እነዚህም ሶስት ነገሮች ሃይማኖት፣ ትሕትና፣ ጥበብ ናቸው፡፡ ሃይማኖት፡- ልጄን ያድንልኛል ብላ ሳትጠራጠር በፍጹም እምነት መቅረቧ ነው፡፡ ትሕትና፡- የልጆችን እንጀራ ለውሾች መስጠት አይገባም ሲላት ውሾችም እኮ ከጌቶቻቸው ማዕድ የወደቀውን ፍርፋሪ ይበላሉ በማለት መልስ መስጠቷ ነው፤ ጥበብ መስሎ ቢነግራት መስላ መናገር ነው፡፡
ከመጀመሪያው ከሃይማኖት ስንጀምር ሃይማኖት እምነት ነው፡፡ ለመንፈሳዊ ሕይወት መሠረቱ እምነት ነው፡፡ እየተጠራጠርን የምናቀርበው ልመና ከደመና በታች ነው የሚቀረው ለዚህም ቅዱስ ያዕቆብ የተናገረው ቃል ትልቅ ማስረጃ ነው፡፡ ይህም “የሚጠራጠር ሰው በነፋስ የተገፋና የተነቃነቀ የባሕርን ማዕበል ይመስላል” /ያዕ. 1፡6/ ስለዚህ እምነተ ጠንካራ መሆን ያስፈልጋል፡፡
ሁለተኛ ከነናዊቷ ሴት ገንዘብ ያደረገችው ትሕትናን ነው፡፡ ትሕትና፡- ራስን ዝቅ አድርጎ ሌላውን ከፍ ማድረግ ነው፡፡ “ራሱን ከፍ የሚያደርግ ሁሉ ዝቅ ይላልና ራሱንም የሚያዋርድ ከፍ ይላል” /ሉቃ. 14፡11/ ትሕትናን መጀመሪያ ያስተማረን የትሕትና ባለቤት መድኃኒታችን ኢየሱስ ክርስቶስ ነው የጸሎተ ሐሙስ ዕለት የቅዱሳን ሐዋርያትን እግር አጥቦ “እኔ እግራችሁን እንዳጠብኳችሁ እናንተ ደግሞ እርስ በርሳችሁ እግራችሁን ትተጣጠቡ ዘንድ ይገባችኋል እኔ ለእናንተ እንዳደረግሁ እናንተ ደግሞ ለሌሎች ታደርጉ ዘንድ ምሳሌ ሰጥቻችኋለሁና” /ዮሐ. 13፡14/ በዚህ መሠረት ትሕትናን ገንዘብ ማድረግ ያስፈልጋል፡፡
ሦስተኛ ከነናዊቷ ሴት ይዛ የተገኘችው ጥበብን ነው፡፡ የጥበብ ሁሉ መጀመሪያ እግዚአብሔርን መፍራት ነው “የጥበብ መጀመሪያ እግዚአብሔርን መፍራት ነው” /መዝ. 110፡10/፣ /ምሳ. 9፡10/ በማለት ነቢየ እግዚአብሔር ዳዊትና ታላቁ ንጉሥ ሰሎሞን ተናግረዋል፡፡ እንዲሁም “ቀኑን ሙሉ እግዚአብሔርን በመፍራት ኑር በእውነት ፍጻሜ አለህና ተስፋህም አይጠፋምና፡፡” /ምሳ. 23፡ 17-18/ ሲል ሰሎሞን የተናገረው ቃል በመዋዕለ ዘመናችን ሁሉ እግዚአብሔርን በመፍራት እንድንኖር ነው፡፡ ስለዚህ የጥበብ፣ የዕውቀት መጀመሪያ እግዚአብሔርን መፍራት በመሆኑ እግዚአብሔርን በመፍራት መኖር ያስፈልጋል፡፡ ጥበብን ገንዘብ ማድረግ እንደሚገባም ‹‹ኩኑ ጠቢባነ ከመ አርዌ ምድር  ወየዋሃነ ከመ ርግብ›› ( እንደ እባብ ብልሆች እንደ ርግብ የዋሆች ሁኑ) /ማቴ 10÷16/  ሲል መድኃኒታችን ኢየሱስ ክርስቶስ የተናገረው ጥበብ አስፈላጊ መሆኑን ለመግለጽ ነው፡፡ ስለዚህ ጥበብን መያዝ ያስፈልጋል፡፡
ሃይማኖት፣ ትሕትና፣ ጥበብ፣ እነዚህን ይዘን በመገኘት በእመቤታችን በቅድስት ድንግል ማርያም አማላጅነት እንዲሁም በቅዱሳን አማላጅነት መንግሥተ ሰማያትን እንድንወርስ ልዑል እግዚአብሔር ወሰን በሌለው ችርነቱ ይርዳን፡፡
ወስብሐት ለእግዚአብሔር

(ላዕከ ወንጌል በእደ ማርያም ይትባረክ (ቀሲስ) የአዲስ አበባ ሀገረ ስብከት የትምህርት ሥርጭት ኃላፊ)

 
<< ጀምር < ወደኋላ 1 2 3 4 5 6 7 8 9 10 ወደፊት > መጨረሻ >>

ገጽ 9 ከ 102

አድራሻ

አዲስ አበባ ፤ ኢትዮጵያ

ኢ-ሜይል: aadioces@gmail.com

ድረ ገጹ ውስጥ ይፈልጉ

ሀሳበ ባሕር(የዘመን ቁጥር)

ባሕረ ሐሳብ የዘመን መቁጠሪያ

ግጻዌ