መንበረ ፓትርያርክ ቅድስተ ቅዱሳን ማርያም ገዳም

የምዕራብና የደቡብ አዲስ አበባ አህጉረ ስብከት ሊቀ ጳጳስ

ገነተ ጽጌ ቅ/ጊዮርጊስ

የምዕራብና የደቡብ አዲስ አበባ አህጉረ ስብከት ሊቀ ጳጳስ

ቦሌ ደብረ ሳሌም መድኃኔዓለም

የምዕራብና የደቡብ አዲስ አበባ አህጉረ ስብከት ሊቀ ጳጳስ

መንበረ ጸባዖት ቅድስት ስላሴ ካቴድራል

የምዕራብና የደቡብ አዲስ አበባ አህጉረ ስብከት ሊቀ ጳጳስ

ርዕሰ አድባራት መንበረ ፀሐይ እንጦጦ ማርያም

የምዕራብና የደቡብ አዲስ አበባ አህጉረ ስብከት ሊቀ ጳጳስ

ምስካየ ኅዙናን መድኃኔኃለም ገዳም

የምዕራብና የደቡብ አዲስ አበባ አህጉረ ስብከት ሊቀ ጳጳስ

ታዕካ ነገሥት በዓታ ለማርያም

የምዕራብና የደቡብ አዲስ አበባ አህጉረ ስብከት ሊቀ ጳጳስ

ደብረ ጽጌ ቅድስ ኡራኤል

የምዕራብና የደቡብ አዲስ አበባ አህጉረ ስብከት ሊቀ ጳጳስ

መንበረ መንግሥት ቅ/ገብርኤል ገዳም

የምዕራብና የደቡብ አዲስ አበባ አህጉረ ስብከት ሊቀ ጳጳስ

ደብረ ኃይል ራጉኤል

የምዕራብና የደቡብ አዲስ አበባ አህጉረ ስብከት ሊቀ ጳጳስ

http://www.addisababa.eotc.org.et/site/components/com_gk2_photoslide/images/thumbm/590538kidste_mariam.jpg http://www.addisababa.eotc.org.et/site/components/com_gk2_photoslide/images/thumbm/895720giorgis.jpg http://www.addisababa.eotc.org.et/site/components/com_gk2_photoslide/images/thumbm/903816bole_medhaniealem.jpg http://www.addisababa.eotc.org.et/site/components/com_gk2_photoslide/images/thumbm/683566trinity.jpg http://www.addisababa.eotc.org.et/site/components/com_gk2_photoslide/images/thumbm/821897entoto_mariam.jpg http://www.addisababa.eotc.org.et/site/components/com_gk2_photoslide/images/thumbm/310283meskaye_1.jpg http://www.addisababa.eotc.org.et/site/components/com_gk2_photoslide/images/thumbm/904160BEATA_MARIAM.jpg http://www.addisababa.eotc.org.et/site/components/com_gk2_photoslide/images/thumbm/578084urael.jpg http://www.addisababa.eotc.org.et/site/components/com_gk2_photoslide/images/thumbm/812647gebrie_gedam.jpg http://www.addisababa.eotc.org.et/site/components/com_gk2_photoslide/images/thumbm/681179raguel.jpg
“እውነተኛው የዓለም ብርሃን”

                                                                                                                               በመምህር ኪዱ ዜናዊ
ብርሃን÷ ብርሃን የጨለማ ተቃራኒ ነው፤ ለዚያም ነው ብርሃን የሌለበት ጨለማ ተብሎ የሚጠራው። ጨለማ መኖሩ የሚታወቀው ብርሃን ሳይኖር ሲቀር ነው። ብርሃን በሁለት መልኩ ልንገልጸው እንችላለን÷ ውጫዊ(ዓለማዊ) እና መንፈሳዊ(ውስጣዊ)፤ የመጀመርያው ከተፈጥሮአዊው(ፀሐይ) ወይም ከሰው ሰራሽ የሚገኝ ሲሆን ያንን ብርሃን ወደ ዓይናችን ሲያንጸባርቅ ነገሮችን ማየት እንችላለን፤ ዓይናችን ያ ብርሃን ካላገኘ ግን ጨለማ ነው ምንም ማየት አይችልም። ሁለተኛው ግን ከመጀመርያው በእጅጉ የተለየ የረቀቀ ብርሃን ነው÷ መንፈሳዊ ብርሃን፤ ውስጣዊ ብርሃን። እግዚአብሔር መንፈስም ብርሃንም ነው(ዮሐ 4:24፤ 1ዮሐ 1:5) እግዚአብሔር በአማኞቹ ልብም ያበራል፤ እንዲህ ስንል ግን በመካከላቸው የሚጋርድ ነገር(ኃጢአት) ከሌለ ነው። ምክንያቱም አምላክ ኃጢአትን ይጸየፋልና።
እንደ ቤተ- ክርስቲያናችን ሥርዓትና ቀኖና ከገና በፊት ያሉት ሦስት ሰናብት ማለትም ስብከት፣ ብርሃን፣ ኖላዊ አንድላይ ዘመነ ስብከት ተብለው ይጠራሉ፡፡ የዘመነ ስብከት ሁለተኛ እሁድ ብርሃን ይባላል።ሌሊቱን ከቅዱስ ያሬድ  መዝሙር    «አቅዲሙ ነገረ በኦሪት» በኦሪት መናገርን አስቀደመ  ብለው በመጀመር በሊቃውንቱ ሲዘመር በዜማ አምላክን ሲወደስና ሲመሰገን ካደረ በኋላ ጧት ደግሞ በሥርዓተ ቅዳሴ  (ሮሜ.13፥11-ፍጻሜ)፣ (1ዮሐ.1፥1-ፍጻሜ)፣ (የሐዋ.26፥12-19) በዲያቆናት እና በካህናት ይነበባሉ። (መዝ.42፥3) በዲያቆኑ በዜማ ይቀርባል፡፡ (ዮሐ.1፥1-19) በካህኑ  ይነበባል እንዲሁም የሊቁ የአትናቴዎስ የምስጋና ጸሎት ይደርሳል ፡፡ እነዚህም ሁሉ ስለ ብርሃኑ ሰፋ ያለ መልእክት ያላቸው ከብሉያትና ከሐዲሳት እንዲሁም ከሊቃውንቱ መጻሕፍት የተውጣጡ ብርሃንነቱን የሚመሰክሩ ናቸው ፡፡
ይህ ሳምንት ብርሃን ተብሎ መጠራቱ ክርስቶስ ከመምጣቱ በፊት የነበሩ ሰዎች በመንፈሳዊ ጨለማ ተውጠው ይህንን ጨለማ የሚያስወግድ መንፈሳዊ ብርሃን በመሻት አምላክን ሲማጸኑት እንደነበሩ ለማዘከር፤ በአሁን ሰዓት ያሉ አማንያንም ብርሃን መጥቶ ጨለማን በማስወገድ ስለታደጋቸው ለማመስገን ላላመኑትና ላላወቁት ደግሞ  <እናንተ የዓለም ብርሃን ናችሁ>  እንዳለው በዓለም ውስጥ ብርሃን ሆኖው ብርሃኑን እያመሰገኑ ያ ብርሃን መግለጥና ለዓለም ሁሉ መስበክ ነው።
ቅዱሳን ነቢያት ሰው ሁሉ በጨለማ ውስጥ መሆኑን (መኖሩን) አውቀው ተረድተው ይህንን ጨለማ ለማስወገድ ደግሞ ብርሃን እንደሚያስፈልግ በማመን የብርሃን ባለቤት ለሆኖው  አምላካችንን ብርሃን እንዲልክላቸው የዘወትር ልመናቸውና ጸሎታቸው እንደነበረና የነፍሳቸውን ብርሃን ይመጣል ብለው መስበካቸውን  ከጽሑፋቸው አይተን እንረዳለን፤ ለሰው ልጅ ድኅነት ከጠበቁባቸው እና ከገለጡባቸው መንገዶችም አንዱ ይህንን ብርሃን እንዲላክላቸው ነበር፡፡ ክርስቶስ ከመምጣቱ በፊት በዘመነ ብሉይ÷ ደዌ-ሥጋ፣ ደዌ- ነፍስ የፀናበት፣ ለሰው ሁሉ አስጨናቂ ዘመን የሆነበት፣ሁሉም  ሰው ብርሃን ከሆነው አምላኩ ርቆ በጭንቅ፣ በመከራና በጨለማ ውስጥ በመኖሩ ተስፋ ቢስ ሆኖ ስለነበር ዘመኑን « ዘመነ-ጨለማ» ብለው በመግለጥ ይህንን ጨለማ  አስወግዶ ወደ ብርሃን የሚቀይር በጨለማ የሚያበራ ብርሃን እንዲላክላቸውና ከብርሃን የተገኘ እውነተኛ ብርሃን፤አማናዊ ብርሃን ጌታችን መድኃኒታችን ኢየሱስ ክርስቶስ  እንዲመጣ ዘወትር ሲጸልዩ ነበር፡፡ መዝሙረኛውም ያን ብርሃን መሻቱን እንዲህ ሲል በመዝሙሩ ጸልዮአል÷
<ፈኑ ብርሃነከ ወጽድቀከ እማንቱ ይምርሐኒ ወይሰዳኒ ደብረ መቅደስከ  ወውስተ አብያቲከ እግዚኦ> /መዝ. 42.3/አቤቱ ብርሃንህንና እውነትህን (ጽድቅህን) ላክ እነርሱ ይምሩኝ ወደ መቅደስህ ተራራና ወደ ማደሪያህ ይወሰዱኝ፣ 
ብርሃን የሆነ፣ጽድቅ የሆነ፣ እውነት የሆነውን ቅዱስ ልጅህን(ወልድን) ክንድህን ልከህ ጨለማ ሆኖ የጋረደንና ካንተ የለየን ኃጢአታችን አስወግዶ ከአንተ አስታርቆ ወደ አንተ ይውሰደን ሲል ነው።  የዚህ ሁሉ ትንቢትና ጸሎት ጌታችን መድኃኒታችን ኢየሱስ ክርስቶስ  በአባቱ ተልኮና በፈቃዱ ወደዚህ ዓለም በመምጣት ከእመቤታችን ከቅድስት ድንግል ማርያም ተወልዶ በተዋህዶ ፍጹም አምላክና ሰው ሆኖ በዓለም ሲያስተምር  «እኔ የዓለም ብርሃን ነኝ» /ዮሐ. 8.12/ በማለት ብርሃንነቱን አረጋግጧል፤ በመቀጠልም እርሱን የሚከተል ሁሉም ያንን ብርሃን እንደሚያገኝ እንዲህ በማለት ተናግሯል‹‹ እኔን የሚከተል ሁሉ የሕይወት ብርሃን ያገኛል በጨለማም አይመላለስም››(ዮሐ 8:12)። ኢየሱስ ክርስቶስ የሰው ሁሉ ሕይወት የሆነች ብርሃን ገልጧል፤ ብርሃን መሆኑን ደቀመዛሙርቱም ስለ  ብርሃንነቱ እንዲህ በማለት መስከሯል «ሕይወት በእርሱ ነበረ፣ ሕይወትም የሰው ብርሃን ነበረ፤ ብርሃንም በጨለማ ያበራል፤ ጨለማም አላሸነፈውም» /ዮሐ. 1.4-5/። ጌታችን መድኃኒታችን ኢየሱስ ክርስቶስ ጨለማ ያላሸነፈው ዘወትር የሚያበራ  እውነተኛ ብርሃን ነው። ሊቃውንትም ‹ዘዘልፈ ያበርህ፣ብርሃን ዘበአማን› ሁሉ ጊዜ የሚያበራ እውነተኛ ብርሃን ‹ዘእንተ ውስጥ አይነነ አብራህከ ወጽልመተ ሐሊናነ፣ብርሃነ_ፍጹማን ወልደ አምላክ ሕያው› የሕሊናችንን ጽልመት ያበራ፣ ዓይነ ልቡናችንን የገለጠው፣ የሕያው አምላክ ልጅ የፍጹማን ብርሃን ብለውታል። ዮሐንስም ስለዚህ ብርሃን ሲመሰክር ለሰው ሁሉ የሚያበራ እውነተኛ ብርሃን ወደ ዓለም መጣ ሲል፣ ቅዱስ ጴጥሮስም ይህ ብርሃን በልቡናችን ውስጥ የሚያበራ ብርሃን ነው ብሎታል(1ኛጴጥ 1:19)።
ቅዱስ ጳውሎስም መጀመርያ በብርሃን የነበረ እንኳ ቢመስለውም ያ ብርሃን ሳይበራለት በጨለማ ሆኖ ይህንን ብርሃን ለማጥፋት የብርሃን ልጆቸና ብርሃን እያሳደደ ሳለ ጌታችንም ትጋቱንና ቅንነቱን  በመመልከት ጌታችን በሚያንፀባርቅ ብርሃን አምሳል እንደተገለጠበት ተናግሯል፡፡ « በመንገድ ሳለሁ እኩለ ቀን ሲሆን በዙሪያዬና ከኔ ጋር በሄዱት ዙሪያ ከፀሐይ ብሩህነት የበለጠ ብርሃን ከሰማይ ሲበራ አየሁ … አንተ የምታሳድደኝ የናዝሬቱ ኢየሱስ ነኝ ” አለኝ(የሐዋ 26:13_15) ቅዱስ ጳውሎስ ያ ብርሃን ከበራለት በኋላ ጨለማ ከእርሱ ውስጥ ስፍራ ስላላገኘ ብርሃንነቱን ለማወጅ ተሯሩጧል፤ ሌሎችም ሲያሰተምር እርሱንም ራሱ ጨምሮ እንደህ ሲል ተናግሯል ‹‹ቀድሞ ጨለማ ነበራችሁና፥ አሁን ግን በጌታ ብርሃን ናችሁ፤ የብርሃኑ ፍሬ በበጎነትና በጽድቅ በእውነትም ሁሉ ነውና ለጌታ ደስ የሚያሰኘውን እየመረመራችሁ፥ እንደ ብርሃን ልጆች ተመላለሱ፤ፍሬም ከሌለው ከጨለማ ሥራ ጋር አትተባበሩ፥ ይልቁን ግለጡት እንጂ፥ እነርሱ በስውር ስለሚያደርጉት መናገር እንኳ ነውር ነውና፤ ሁሉ ግን በብርሃን ሲገለጥ ይታያል፤ የሚታየው ሁሉ ብርሃን ነውና።
ስለዚህ አንተ የምትተኛ ንቃ ከሙታንም ተነሣ ክርስቶስም ያበራልሃል ይላል›› (ኤፌ 5:8-14)። ክርስቶስ በአህዛብም ብርሃን እንደሆነ ቀድሞዉኑ ተወስኖ ነበር፤ (ኢሳ 49:6)‹…እስከ ምድር ዳር ድረስ መድኃኒት ትሆን ዘንድ ለአህዛብ ብርሃን አድርጌ ሰጥቼሃለሁ› ይላል። በጨለማ የተጓዘ እንቀፋት ሳይመታው አይቀርም፣ ክርስቶስ ግን ይህንን ጨለማ በማስወገድ ብርሃን በመሆን ከእንቅፋትም ከመሰናክልም ሊያድን መጥቷል፤ እንቅፋቱንም ያሳያል። ስለዚህ ከእንቅፋትም ከውድቀትም ለመዳን በዚህ ብርሃን መራመድ ይገባል። እመኑ በብርሃኑ ወአንሰውስዉ እንዘ ብክሙ ብርሃን እንዳለው ሊቁ፤ በብርሃኑ አምነን በብርሃን እንመላለስ። በራሳችን ካልራቅን ጨለማ ካልመረጥን እርሱ ይወደናል ስለ ወደደን ነው  ሳያዳላ ስለ ሁሉም ሰው ወደ ዓለም የመጣ‹ ብርሃን ዘበአማን ዘያበርህ ለኲሉ ሰብእ ለእለ ይነብሩ ውስተ ዓለም በእንተ ፍቅረ ሰብእ መጻእከ ውስተ ዓለም ወኲሉ ፍጥረት ተፈስሃ በምጽአትከ› ሁሉም ፍጡር የተደሰተብህ፣ ሰውን ወደህ ወደዚህ ዓለም የመጣህ፣ በዓለም ውስጥ ላለ ሁሉ ሰው የሚያበራ እውነተኛ ብርሃን ነህ ተብሏል። ታድያ እኛስ በመምጣቱ ደስተኞች ነን? ያለ እርሱስ በጨለማ ውስጥ እንደምንኖር ተገንዝበናል?
በዘመነ ኦሪት ለነበሩ ሰዎች እርሱ ራሱ የፈጠራት ፀሐይ ከእነርሱ አልጠፋችም ነበር አሁንም አለች እርሷ ለሁሉም ዓለም የፀጋ ስጦታ ናት፤ነገር ግን በመንፈሳዊ ጨለማ ውስጥ ሆኖው ብርሃንህን ላክልን ሲሉ የነበረ አሁን በግዙፍ ዓይናችን የምናያት የምንመለከታት ፀሐይ የምትሰጠው ብርሃን አጥተው አይደለም፣ የውስጥን ጨለማ ድንቁርናና ኃጢአትን አስወግዶ ውስጣዊ ሕሊናን በማብራት ያለምንም እንከን አምላካችንን የምናይበትና የምንከተልበት መንፈሳዊ ዓይናችን ሊያበራ የሚችል አማናዊ ብርሃን ፈልገው ነው እንጂ፤ አሁንም እኛ የእውራን ዓይንና አእምሮ የሚገላልጠውን አማናዊ ብርሃን እንጋብዘው፤ እንድያውም እርሱ በበራችን ሆኖ እያንኳኳ ነው እንክፈትለት (ራእ 3:20)፤ እነዚያን ሰዎች ሲለምኑ ነበር እኛ ደግሞ እየተለመንን ነው፤ አንድ ቀን ጌታችን ሐዋርያትን ሲያነጋግራቸው ብዙዎች ለማየት፣ ለመስማት፣ ተመኝተው አላዩም አልሰሙምም እናንተ ግን ብፁአን ናችሁ፤ ዓይናችሁም አይቷል ጆሮአችሁም ሰምተዋል ሲል ዕድለኞች መሆናቸውን መስክሯል። ዮሐንስም እኛም በዓይናችን አይተናል እንመሰክርማለን ብሏል። ውድ አንባብያን ሆይ! እኛም ሁላችን በዚህ ብርሃን አምነን በብርሃኑ ከተመላለስን ለእኛ ብሎ ነው የመጣና የዚህ ክብርና ብርሃን ባለቤቶች ነን። በዚህ ዓለም የምናገኘው የፀሐይ ብርሃን ከሁሉም ዓለም በጋራ ነው የምንጠቀመው ውስጣዊ ማንነታችንም አይደለም አይገልጽምም፤ የሚያስደንቀው ግን የእግዚአብሔር ቸርንት ነው፤ ምክንያቱም ያ ብርሃን ለሚያምኑት ሆነ ለማያምኑት፤ ለጠላቶቹም ሆነ ለወዳጆቹም በእኩል መስጠቱ ነው፤ ሙሉ በሙሉ ባይሆንም ቀኑን በማፈራረቅ ለዓለም ስታበራ የቆየች ፀሐይ እንደ ሌሎቹ ፍጡራን አንድ ቀን ማለፍዋ ስለማይቀር የምትሰጠው ብርሃን የተፈራረቀና ውጫዊ ብርሃን  ቢሆንም እንኳ እሱም ቀጣይነት እንደሌለው የተረጋገጠ ነው፡፡  ስለዚህ ብርሃን ከሚጠሉና ጨለማን ከመረጡ ሰዎች መለየት አለብን፤ ከጨለማው ዓለምና አስተሳሰብ ወጥተን በፈጠራት ፀሐይ ዓለምን ያበራ እርሱ ራሱ ብርሃን በመሆን ደግሞ ውጫዊውንና ውሰጣዊውን የሚያበራ የሥጋና የነፍስ ብርሃን የሆነ የሕይወት ብርሃን እንያዝ እንከተል <የመዳን ቀን አሁን ነው> እንዳለው ሐዋርያው ከዓለማዊ አስተሳሰብ ወጥተን ወደመንፈሳዊና ዘላለማዊ ሕይወት ግዜው ሳይመሽ አሁን ተሎ ብለን  እንግባ፡፡ ሌላ ጊዜ አንጠብቅ በሆነ አጋጠሚ ሳንዘጋጅ ከዚህ ዓለም ከተለየን የኛ ጊዜ እሱነውና በጸጸት ሰለማይመለስ፤ ከሁሉም ነገር አስቀድማችሁ መንግስቱንና ጽድቁን ፈልጉ እንዳለን ጌታችን ቃሉን አክብረን ተዘጋጅተን እንጠብቀው። ይህንን ማድረጋችን ከመብላት፣ ከመልበስ፣ ከመስራትና ከትዳር አይከለክለንም፤ ከኃጢአትና ሥርዓት አልባ ከሆነ ዓለማዊ ምኞት እንጂ። ቅዱስ ጳውሎስም እንዲህ ብሎ እየመከረን ነው<ከእንቅልፍ የምትነሡበት ሰዓት አሁን እንደ ደረሰ ዘመኑን እወቁ፤ ካመንንበት ጊዜ ይልቅ መዳናችን ዛሬ ወደ እኛ ቀርቦአልና። ሌሊቱ አልፎአል፥ ቀኑም ቀርቦአል። እንግዲህ የጨለማውን ሥራ አውጥተን የብርሃንን ጋሻ ጦር እንልበስ። በቀን እንደምንሆን በአገባብ እንመላለስ፤ በዘፈንና በስካር አይሁን፥ በዝሙትና በመዳራት አይሁን፥ በክርክርና በቅናት አይሁን፤ ነገር ግን ጌታን ኢየሱስ ክርስቶስን ልበሱት፤ ምኞቱንም እንዲፈጽም ለሥጋ አታስቡ>።(ሮሜ 13:11-14)። በእርሱ ዘንድ ጨለማ የለም ሁሌም ብርሃን ነው፡፡ ‹‹ከእንግዲህም ሌሊት አይሆንም ጌታ አምላክም በእነርሱ ላይ ያበራላቸዋልና የመብራት ብርሃንና የፀሐይ ብርሃን አያስፈልጋቸውም፤ ለዘላለምም እስከ ዘላለም ይነግሳሉ››(ራእ 22፡5)፡፡ ያ ብርሃንም ራሱ መድኃኔዓለም ነው፤ «ለከተማይቱም የእግዚአብሔር ክብር ስለሚያበራላት መብራትዋም በጉ ስለ ሆነ ፀሐይ ወይም ጨረቃ እንዲያበሩላት አያስፈልጋትም»(ራእ 21:13)፡፡ ውድ የእግዚአብሔር ቤተሰቦች  በእውነት ይህንን  ክብርና ብርሃን ሊያመልጠን አይገባም፤ በዚህ ብርሃን   ከብርሃን አባትና ብርሃን ከሆነው ከጌታችን ከመድኃኒታችን ኢየሱስ ክርስቶስ ከቅዱሳኑምጋር ለዘላለም ለመኖር በብርሃኑ አምነን ከብርሃንና ከብርሃን ልጆች ቅዱሳን ጋር አሁን በትንሳኤ ልቡና በአብ ቀኝ እንቀመጥ (ቈላ3:1-3፤ ኤፌ2:6-7)። በብርሃኑ ልቡናችንና ሁለንተናችንን ያብራ !!!
   ወስብሃት ለእግዚአብሔር አሜን!
                     

 
በአዲስ አበባ ሀ/ስብከት የዘመናችን የኢትዮጵያ ኦርቶዶክስ ተዋህዶ ቤተክርስቲያን ተግዳሮቶችና የመፍትሔ ሃሳቦች በሚል ርእስ ጥናታዊ ጽሁፍ ቀረበ

6139

በአዲስ አበባ ሀ/ስብከትና በሰንበት ትምህርት ቤት ማደራጃ መምሪያ በተደረገ የጋራ ዝግጅት የዘመናችን የኢትዮጵያ ኦርቶዶክስ ተዋህዶ ቤተክርስቲያን ተግዳሮቶችና  የመፍትሔ ሃሳቦች በሚል ርእስ የተጠና ጥናታዊ ጽሑፍ የሃገረ ስብከቱ ሥራ አስክያጅ መ/ር ጎይትኦም ያይኑ፤የአዲስ አበባ ሃገረ ስብከት ገዳማትና አድባራት አስተዳዳሪዎች፣የየአድባራቱ ሰባክያነ ወንጌል ሐላፊዎች፣ ሊቃነ መናብርትና የሰንበት ትምህርት ቤት አባላት ተወካዮች በተገኙበት በአዲስ አበባ ሃ/ስብከት አዳራሽ ታህሣሥ 14/2010 ዓ.ም ጥናታዊ ጽሑፉ ቀርቧል።ጥናቱ በሁለት ክፍል የቀረበ ሲሆን በተሳታፊዎች በኩል ለውይይት መድረኩ ክፍት ተደርጎ ነበር። በቀረበው ጥናት ላይ ቤተ ክርስቲያናችን በ21ኛው መቶ ክፍለ ዘመን ያጋጠሟት ተግዳሮቶችና ውጣውረዶች በርካታ ቢሆኑም የመልካም አስተዳደር እጦት፣ አግባባዊ የሆነ የአገልጋይነት ክብር አለመኖር፣ ለትክክለኛ ስራ ትክክለኛ ሰው አለመመደብና የመሳሰሉት መሆናቸው ተገልጾ ዋናውና ወቅታዊ የቤተክርስቲያን ተግዳሮት ግን የፕሮቴስታንታዊ ተሐድሶ አስተምህሮአዊ እንቅስቃሴና የእስላማዊ አክራሪነትና ጽንፈኝነት ናቸው ተብሏል።በጥናታዊ ዳሰሳው ላይ ቤተክርስቲያናችን ያለችበትን ወቅታዊ ሁኔታ አስመልክቶ የተበታተነ፣ ወጥነት የሌሌው፣ብዙ ትግል ጥቂት ውጤት በመሆኑ የችግሩ መስፋትና እልባት አለማግኘት ችግሩን እስካሁን ድረስ እንዲቀጥል አድርጎታል ከዚህም ጋር ተያይዞ ቤተክርስቲያናችን በርካታ ሊቃውንትና መምህራን እንዲሁም የስነ–መለኮት ምሩቃን ያሏት ባለብዙ አንጡራ ሃብት ያላት ብትሆንም የስብከተ ወንጌል መድረኳንና የሰንበት ትምህርት ቤት አዳራሿን የቤተ ክርስቲያኒቱን አስተምህሮ ጠንቅቀው በማያውቁ የመድረክ ሰዎች መወከሏ ሌላኛውና አንገብጋቢው ችግር መሆኑም ነው የተገለጸው። በየትኛውም መዋቅራዊ አደረጃጀት ባለው ተቋም ውስጥ የራሱ የሆነ ስልታዊ መዋቅር፣ኃላፊነትና ተጠያቂነት ያለው አካል፣የሚከናወኑ ክንውኖች፤ የሚሰሩ ስራዎችና በእቅድ የሚመራ የስራ ክንውን ቢኖራቸውም በየጊዜው አፈጻጸሙን የመገምገም፣ የመፈተሽና የማስተካከል እንዲሁም አስፈላጊ ሆኖ ከተገኘ የመለወጥም ስራ ጭምር ሲደረግ እንመለከታለን። በቤተክርስቲያናችንም ነገሩን በበላይነት የሚመራው አካል አትኩሮት በመስጠት የተደራጀና የሰለጠነ በቂ የሰው ሃይል በየዘርፉ በመመደብ፣ ያገባኛል የሚል የተቆርቃሪነት ስሜት በማስፈን፣ሐዋርያዊ አስተምህሮዋን በመጠበቅ፣ ቀኖናዋንና ሥርዓትዋን ዘመኑንና ትውልዱን በጠበቀ መልኩ በማሻሻልና በማስተካከል ሐዋርያዊ ግዴታዋን  ያለቸልታና ዝምታ   ልትወጣ ይገባታል። የችግሩ አሳሳቢነት በወፍ በረራ አስተምህሮ የሚቀረፍ ባለመሆኑ ቤተክርስቲያኒቱ ያሏትን ሊቃውንት አስተባብራና አጠንክራ መስራት እንዳለባትም በጥናቱ ለመዳሰስ ተሞክረዋል። ቤተክርስቲያኒቱ 10 ሚሊዮን አማንያንን በቀላሉ ለመዘረፍ ዋንኛ ምክንያት የእኛ አለመወያየት፣ አለመነጋገርና በጋራ አለመስራት መሆኑም  ተነስቷል።በታዳሚዎቹ ሰፋ ያለ ወይይት የተደረገ ሲሆን ብዙ አስተያየቶችም ተሰንዝሯል።
 በመጨረሻም የአዲስ አበባ ሃገረስብከት ሥራ አስኪያጅ መምህር ጎይትኦም ያይኑ  ከሰንበት ትምህርት ቤት ማደራጃና መምሪያ ሃላፊ መምህር እንቁ ባህሪ ንግግር በመቀጠል ባደረጉት የመደምደምያ ንግግር በቀረበው ጥናት ላይ አያይዘው የቀረበው ጥናት እንደ አንድ የቤክርስቲያን ችግር መሆኑን ቢያወሱም ሌሎች በርካታና አንገብጋቢ  የቤተ ክርስቲያን ችግሮች መኖራቸውንም ሳይናገሩ አላለፉም። ቤተክርስቲያናችን በቂ የሚባል የሰው ኃይል አላት፤ ነገር ግን ሁሉም አካላት ሐላፊነታቸውንና ድርሻቸውን በአግባቡ አልተወጡም።  ይህም የቀረበው ጥናት የት እንዳለንና ደረጃችንን በመጠኑ የሚያሳይ ቢሆንም ሌሎችንም ችግሮች አካትቶ የበለጠ ጥናት ልናደርግ ይገባናል በማለት ሐሳቡን አጠናክረዋል። ቤተክርስቲያኒቷ ከሲኖዶስ ጀምሮ እያንዳንዱ ቤት ድረስ የሚገባ መዋቅር  አላት። በጣም የሚሳዝነው ነገር ቢኖር በመዋቅሩ መሰረት አለመስራት፣ አግልጋዮች የተባበረና የተቀናጀ አንድነት አለመኖር፣ለአባቶች የሚገባውን ክብርንና የአባትነት ስሜት አለመስጠትና የመሳሰሉት ዘርፈ ብዙ ችግሮች መሆናቸውን አስርድተው ወደፊትም ሀገረስብከቱ ከሚመለከታቸው አካላት ጋር በመተባበርና የቅዱስነታቸውን መልካም ፍቃድ በመጠየቅ እንዲሁም  አባታዊ ምክራቸውን በማዳመጥ ለቤተ ክርስቲያን የሚበጀውንና የሚጠቅመውን ሁሉ ከማድረግ ችላ እንደማይል የውይይት መድረኮችም እንደሚቀጥሉ በመናገር ሐሳባቸውን ደምድመዋል።

 
የሚዘራና የሚያጭድ አብረው ደስ ይላቸዋል

ጠቢቡ ሰሎሞን “ለሁሉም ጊዜ አለው” ብሎ እንደተናገረው የዘርና የመከር ወቅቶች የተለያዩ ናቸው፡፡ በግብርና ሥራ ተመድበው የሚሠሩ ገበሬዎች በዘመነ ክረምት ይዘራሉ፡፡ በዘመነ መፀው ደግሞ በክረምት የዘሩትን ሰብል ያጭዳሉ፣ ይሰበስባሉ፣ ይከምራሉ፣ ይወቃሉ፡፡ ገለባውን ከፍሬው ለይተው በጎተራ ሲያከማቹ ገለባውን በእሳት ያቃጥላሉ በዚህም ሥራቸው ራሳቸውን ችለው በልተው፣ ጠግበው ለሌላውም ይተርፋሉ፡፡
የመዝሪያ የማጨጃና የመሰብሰቢያ ጊዜያት የተለያዩ እንደመሆናቸው መጠን የሠራተኞችም የዕለት ኑሮ የተለያየ ሁኔታ አለው፡፡ በዘመነ ክረምት እየተቸገሩ እየተራቡ ያርሳሉ፣ ይዘራሉ፣ በዘመነ መፀው ደግሞ እንደልባቸው እየበሉ እየጠጡ ይሠራሉ፡፡ ይህንንም ነቢዩ ዳዊት ሲገልጽ “በለቅሶ የሚዘሩ በደስታ ያጭዳሉ፣ ይሰበስባሉ፣ ወደ እርሻቸው በሄዱ ጊዜ ዘራቸውን ተሸክመው እያለቀሱ ተሰማሩ በተመለሱ ጊዜ ግን ነዶአቸውን ተሸክመው ደስ እያላቸው ይመጣሉ” ብሏል፡፡ (መዝ 125፡5-6)
በዚህ አንጻር ሊቃውንት አባቶቻችን ነቢያትን በክረምት ሐዋርያትን በበጋ ገበሬዎች መስለው ተናግረዋል፡፡ ምሳሌውንም ሲያብራሩ የክረምት ገበሬዎች ጧት ከቤታቸው ሲወጡ ምሳ አያገኙም ሞፈር ቀንበር፣ ዘርና የበሬ ዕቃዎችን በትከሻቸው ላይ አነባብረው ተሸክመው በሮቻቸውን እየነዱ ወደ እርሻቸው ይሄዳሉ፡፡ ከዚያም ከላይ ዝናቡ ከታች ጭቃው ወዠቦውና ነፋሱ ሲያንገላታቸውና ሲያዋክባቸው ይውላሉ፡፡ ማታ ወደ ቤታቸው በተመለሱም ጊዜ የረባ ምግብ አያገኙም፡፡ ጎመን ጨምቀው በልተው ያድራሉ፡፡ ክረምቱ አልፎ እህል የሚያልቅበት የወደፊት አዝመራ የማይደርስበት የቅጠል ጊዜ ነውና በቂ ምግብ ለማግኘት ያስቸግራል፡፡
የበጋ ገበሬዎች ግን ማለዳ ከቤታቸው ሲወጡ ምሳቸውን በሚገባ በልተው ይወጣሉ ቀን በሥራ በሚውሉበትም ቦታ እሸቱንና እንኩቶውን እየተመገቡ ሲሠሩ ይውላሉ፡፡ ማታ ወደ ቤታቸውም ሲመለሱ እንጀራው በሌማት ጠላው በማቶት ተዘጋጅቶ ይቆያቸዋል፡፡ ያንን እየበሉና እየጠጡ ይደሰታሉ፡፡
በክረምት ገበሬዎች የተመሰሉት ነቢያት ትንቢት በሚናገሩበትና በሚያስተምሩበት ጊዜ ከብሌት ሳይታደሱ በመንፈስ ቅዱስ ሳይጎለምሱ ልጅነትን ሳያገኙ ስለሆን መከራው ጸንቶባቸዋል፡፡ በበጋ ገበሬዎች የተመሰሉት ሐዋርያት ግን በሚያስተምሩበት ጊዜ የሚደርስባቸውን መከራ ሁሉ ከምንም አይቆጥሩትም ነበር፡፡ እንዲያውም በአደባባይ አቁመው ወቅሰው ገርፈው ስለክርስቶስ እንዳያስተምሩ አስጠንቅቀው ሲያሰናብቷቸው ደስ እያላቸው ይሄዱ ነበር፡፡ (የሐዋ ሥ. 5÷40-41)
ነቢያት ስለክርስቶስ ሰው መሆንና ከድንግል ማርያም በድንግልና ተጸንሶ በደንግልና መወለድ ወደዚህ ዓለም መጥቶ ሰው ሆኖ አሥራ ሁለቱን ሐዋርያት መምረጡን ዓለሙንም በጠቅላላ ካፍዳና ከመርገም ማዳኑን ተናግረዋል፡፡ ምሳሌን መስለዋል ሱባኤንም ቆጥረዋል፡፡ ከተናገሯቸውም ትንቢቶች ጥቂቶችን ቀጥሎ እንመልከት፡፡
ከዓበይት ነቢያት ኢሳይያስ “እነሆ ጌታ ራሱ ምልክት ይሰጣችኋል፡፡ እነሆ ድንግል ትጸንሳለች ወንድ ልጅም ትወልዳለች ስሙንም አማኑኤል ብላ ትጠራዋለች” (ትን. ኢሳ 7÷14)
“ሕፃን ተወልዶልናልና ወንድ ልጅም ተሰጥቶናልና አለቅነትም በጫንቃው ላይ ይሆናል ስሙም ድንቅ፤ መካር፤ ኃያል አምላክ የዘለዓለም አባት፤ የሰላም አለቃ ተብሎ ይጠራል፡፡” (ትን. ኢሳ 9÷6) በተጨማሪም ይኸው ነቢይ “ትወጽእ በትር እምሥርወ እሴይ ወየዓርግ ጽጌ እምጕንዱ” ከእሴይ ግንድ በትር ትወጣለች ከሥሩም ቁጥቋጦ ያፈራል፡፡” (ትን. ኢሳ 11፡1) ሲል ነቢዩ ኢሳይያስ ትንቢት ተናግሯል፡፡ ሌሎችም ነቢያት ስለ ክርስቶስ ሰው መሆን ብዙ ምሳሌ መስለዋል ብዙ ሱባኤም ቆጥረዋል፡፡ ብዙ ትንቢትም ተናግረዋል ነገር ግን ዓረፍተ ዘመን ስለጋረዳቸው ከዘመኑ ሳይደርሱ ሲያልፉ ሐዋርያት ከዘመኑ ደርሰው ከመድኃኒታችን ኢየሱስ ክርስቶስ ተምረዋል፡፡ ከእርሱም ጋር አብረው በልተዋል፤ ጠጥተዋል በዓይናቸውም ተመልክተዋል፡፡
ጌታችን አምላካችን መድኃኒታቸን ኢየሱስ ክርስቶስ ሐዋርያትን መርጦ በሚያስተምርበት ጊዜ “እነሆ እላችኋለሁ ዓይናችሁን አንሡ አዝመራውም አሁን እንደ-ደረሰ እርሻውን ተመልከቱ የሚያጭድ ደመወዝን ይቀበላል፡፡ የሚዘራና የሚያጭድም አብረው ደስ እንዲላቸው ለዘለዓለም ሕይወት ፍሬን ይሰበስባሉ፡፡ አንዱ ይዘራል አንዱም ያጭዳል የሚለው ቃል በዚህ እውን ሆኗልና፡፡ እኔም እናንተ ያልደከማችሁትን ታጭዱ ዘንድ ሰደድኋችሁ ሌሎች ደከሙ እናንተም በድካማቸው ገባችሁ ብሏል፡፡” (የዮሐ ወን. 4÷35-38) እንዲሁም (በሉቃ. ወን. 10÷23) “እናንተ የምታዩትን የሚያዩ ዓይኖች ብፁዓን ናቸው፡፡ እላችኋለሁና እናንተ የምታዩትን ብዙዎች ነቢያትና ነገሥታት ሊያዩ ወደዱ አላዩም እናንተ የምትሰሙትንም ሊሰሙ ወድደው አልሰሙም፡፡” በማለት ለደቀ መዛሙርቱ አስተምሯል፡፡
“አባት ያበጀው ለልጅ ይበጀው” እንደሚባለው ከልደተ ክርስቶስ በፊት የተነሡት አባቶች ነቢያት የተናገሩት ቃለ ትንቢት በጊዜው የነበሩትን ሐዋርያት ብቻ ሳይሆን ከእነርሱ ቀጥለው የተነሡትን የክርስቶስ ተከታዮች ሁሉ አስደስቷቸዋል፡፡ አሁንም ሆነ ወደፊት የሚነሱትና የተነሱት ትውልዶች የሚያስተምሩትና የሚማሩት ስለክርስቶስ ወደዚህ ዓለም መጥቶ መወለድና ስለዓለም ድኅነት የተነገሩትን ትንቢቶች የተመሰሉትን ምሳሌዎች የተቆጠሩትን ሱባኤዎች መሠረት በማድረግ ነው፡፡
ነቢያት ትንቢት የተናገሩበት ጊዜ የተለያየ ቢሆንም ትንቢቶቹ የሚታወሱበት ወቅት ዘመነ ስብከት ተብሎ ተሰይሟል፡፡ ይህም ከኅዳር 15 እስከ ታሕሳስ 29 ቀን ያለው ጊዜ ሲሆን በተለይ ከልደት በፊት ያሉት ሳምንታት ስብከት፣ ብርሃን፣ ኖላዊ እየተባሉ ይጠራሉ፡፡
ሐዋርያው ቅዱስ ጳውሎስ “ነገር ግን የዘመኑ ፍፃሜ በደረሰ ጊዜ እግዚአብሔር ከድንግል ማርያም የተወለደውን ልጁን ላከ” (ገላ 4÷4) ብሎ እንደገለጸው የትንቢቱ ቀጠሮ በደረሰ ጊዜ ጌታችን አምላካችን መድኃኒታችን ኢየሱስ ክርስቶስ ከቅድስት ድንግል ማርያም ተወልዶልናል፡፡
ገበሬ የጣረበት የጋረበት  ለብዙ ጊዜ የደከመበት የእርሻ ሰብል ደርሶለት ፍሬውን በተመገበ ጊዜ እንደሚደሰት ነቢያት ይወርዳል ይወለዳል ብለው ያስተማሩለት አምላካችን ኢየሱስ ክርስቶስ በተወለደ ጊዜ ሐዋርያት በአካለ ሥጋ ተገኝተው ወረደ ተወለደ ብለው አስተምረው ደስ ሲላቸው ይወርዳል ይወለዳል ብለው ያስተማሩ ነቢያትም በአካለ ነፍስ ደስ ተሰኝተዋል፡፡ የሚዘራና የሚያጭድ አብረው ደስ ይላቸዋል የተባለውም ስለዚህ ነው፡፡ የሐዋርያትን አሠረ ፍኖት ተከትለን የምንማርና የምናስተምር ሁላችንም በዚህ ደስ ሊለን ይገባል፡፡
                            ወስብሐት ለእግዚአብሔር

(ከላዕከ ወንጌል በእደማርያም ይትባረክ (ቀሲስ) የአዲስ አበባ ሀገረ ስብከት የትምህርት ሥርጭት ኃላፊ)

 
<< ጀምር < ወደኋላ 1 2 3 4 5 6 7 8 9 10 ወደፊት > መጨረሻ >>

ገጽ 2 ከ 109

አድራሻ

አዲስ አበባ ፤ ኢትዮጵያ

ኢ-ሜይል: aadioces@gmail.com

ድረ ገጹ ውስጥ ይፈልጉ

ሀሳበ ባሕር(የዘመን ቁጥር)

ባሕረ ሐሳብ የዘመን መቁጠሪያ

ግጻዌ