መንበረ ፓትርያርክ ቅድስተ ቅዱሳን ማርያም ገዳም

የምዕራብና የደቡብ አዲስ አበባ አህጉረ ስብከት ሊቀ ጳጳስ

ገነተ ጽጌ ቅ/ጊዮርጊስ

የምዕራብና የደቡብ አዲስ አበባ አህጉረ ስብከት ሊቀ ጳጳስ

ቦሌ ደብረ ሳሌም መድኃኔዓለም

የምዕራብና የደቡብ አዲስ አበባ አህጉረ ስብከት ሊቀ ጳጳስ

መንበረ ጸባዖት ቅድስት ስላሴ ካቴድራል

የምዕራብና የደቡብ አዲስ አበባ አህጉረ ስብከት ሊቀ ጳጳስ

ርዕሰ አድባራት መንበረ ፀሐይ እንጦጦ ማርያም

የምዕራብና የደቡብ አዲስ አበባ አህጉረ ስብከት ሊቀ ጳጳስ

ምስካየ ኅዙናን መድኃኔኃለም ገዳም

የምዕራብና የደቡብ አዲስ አበባ አህጉረ ስብከት ሊቀ ጳጳስ

ታዕካ ነገሥት በዓታ ለማርያም

የምዕራብና የደቡብ አዲስ አበባ አህጉረ ስብከት ሊቀ ጳጳስ

ደብረ ጽጌ ቅድስ ኡራኤል

የምዕራብና የደቡብ አዲስ አበባ አህጉረ ስብከት ሊቀ ጳጳስ

መንበረ መንግሥት ቅ/ገብርኤል ገዳም

የምዕራብና የደቡብ አዲስ አበባ አህጉረ ስብከት ሊቀ ጳጳስ

ደብረ ኃይል ራጉኤል

የምዕራብና የደቡብ አዲስ አበባ አህጉረ ስብከት ሊቀ ጳጳስ

http://www.addisababa.eotc.org.et/site/components/com_gk2_photoslide/images/thumbm/590538kidste_mariam.jpg http://www.addisababa.eotc.org.et/site/components/com_gk2_photoslide/images/thumbm/895720giorgis.jpg http://www.addisababa.eotc.org.et/site/components/com_gk2_photoslide/images/thumbm/903816bole_medhaniealem.jpg http://www.addisababa.eotc.org.et/site/components/com_gk2_photoslide/images/thumbm/683566trinity.jpg http://www.addisababa.eotc.org.et/site/components/com_gk2_photoslide/images/thumbm/821897entoto_mariam.jpg http://www.addisababa.eotc.org.et/site/components/com_gk2_photoslide/images/thumbm/310283meskaye_1.jpg http://www.addisababa.eotc.org.et/site/components/com_gk2_photoslide/images/thumbm/904160BEATA_MARIAM.jpg http://www.addisababa.eotc.org.et/site/components/com_gk2_photoslide/images/thumbm/578084urael.jpg http://www.addisababa.eotc.org.et/site/components/com_gk2_photoslide/images/thumbm/812647gebrie_gedam.jpg http://www.addisababa.eotc.org.et/site/components/com_gk2_photoslide/images/thumbm/681179raguel.jpg
36ኛው የኢ/ኦ/ተዋህዶ ቤተክርስቲያን አጠቃላይ ሰበካ መንፈሳዊ ጉባኤ በሰላም ተጠናቀቀ

230

ከጥቅምት 6/ 2010 እስከ ጥቅምት 9 /2010 ሲካሄድ የሰነበተው  የ36ኛው አጠቃላይ መንፈሳዊ ጉባኤ ባለ 21 ነጥብ የአቋም መግለጫ በማውጣት ተጠናቋል፡፡ በጉባኤው መጨረሻ ቀን የተከናወኑትን ክንውኖች አስመልክቶ ዘገባው እንደሚከተለው ቀርቧል፡፡ማንኛውንም ሥራ ከመስራት አስቀድሞ መጸለይ መጽሓፍ ቅዱሳዊ መርህ ስለሆነና እግዚአብሔር የሚለመንበት መንገድ በመሆኑ በዕለቱ ከሁሉም አስቀድሞ ጉባኤው በብፁዕ ወቅዱስ ፓትርያሪኩ ጸሎትና ቡራኬ ተከፍቷል፤ ከዚህ በመቀጠልም ሰው ከእግዚአብሔር  አፍ በሚወጣ ቃል ሁሉ እንጂ  በእንጀራ ብቻ አይኖርም ተብሎ በወንጌል እንደተጻፈው ብጹዕ አቡነ ቄርሎስ ለጉባኤው ታዳሚዎች የሕይወት እንጀራና የነብስ ስንቅ የሆነውን ትምህርተ ወንጌል  አስተላልፈዋል፡፡ ይህ ዕለት የጉባኤው መጨረሻ ቀን እንደመሆኑ መጠን በጠቅላይ ቤተክህነት ዋና ሥራ አስኪያጅ ብፁዕ አቡነ ዲዮስቆሮስ  ከመጀመሪያው  የጉባኤ ቀን አንስቶ ቃለ ጉባኤ እንዲይዙ በታዘዙት የቃለ ጉባኤ አርቃቂ ኮሚቴዎች አማካኝነት የሶስቱን ቀናት ሪፖርት፤ ውይይትና ምክክር አስመልክቶ ጥልቅና አስደማሚ  እንዲሁም ወቅታዊ የቤተክርስቲያን ችግሮችን በዳሰሰ  መልኩ በመጋቤ ካህናት ኃ/ስላሴ ዘማርያም ተወካይነት ለጉባኤው ታዳሚዎች ባለ 21 ነጥብ የጋራ አቋምና ውሳኔ ተነቧል፡፡ይህ በእንዲህ እንዳለ የጠቅላይ ቤተ ክህነቱ ዋና ሥራ አስኪያጅ ብፁዕ አቡነ ዲዮስቆሮስ የቀረበው የጋራ አቋምና ውሳኔ ጥሩ ነው ቢሉም በጉባኤው ያልተካተተ  ሐሳብ አለው ይህ ደግሞ እንደጋራ መግለጫ ሊቀርብ አይገባም ስላሉ  ብፁዕ ወቅዱስ ፓትርያሪኩ በሲኖዶስ የጸደቀውን  ጨምረው ጻፉ እንጂ  የራሳቸው ሃሳብና ልበ-ወለድ ኣይደለም ሲሉ የአቋም መግለጫውን በማጽደቃቸው የታዳሚውን ልብና የቤተክርስቲያንን ሉዓላዊ ክብር አስጠብቀዋል፡፡በመቀጠልም የጠቅላይ ቤተ ክህነቱ ዋና ሥራ አስኪያጅ ብፁዕ አቡነ ዲዮስቆሮስ ስላለፉት የጉባኤ ቀናት አጠቃላይ ቆይታና ወደፊትም ቤተ ክርስቲያን በምን መልኩ መጓዝ እንዳለባት ሰፋ ያለ ማብራሪያ በንባብ መልክ አስደምጠው መድረኩን ለቅዱስ ፓትሪያርኩ አስረክበዋል፤ ቅዱስ ፓትርያሪኩ ስለ 36ኛው አጠቃላይ መንፈሳዊ ጉባኤና ስለ ቤተ ክርስቲያን ህልውና አባታዊና መንፈሳዊ መልእክታቸውን ለጉባኤው ታዳሚዎች እንዲህ በማለት አስተላልፈዋል የቤክርስቲያንን ጥሪ አክብራችሁ ፡ ከውጭም ከውስጥም ስለመጣችሁ እናመሰግናችኋለን የጋራ ቤታችን በሆነው የስብከተ ወንጌል አዳራሽ ያገናኘን እግዚአብሔር ይመስገን፡ቤተክርስቲያናችን የሁላችን ህልውና ናት፡ሁላችን ልንጠለልባትም ይገባል፡ከዚህ መጠለያ ወጥተው የሚኮበልሉ ወገኖቻችን በምን ምክንያት እንደሚኮበልሉ ልንረዳቸው ያስፈልጋል፤ ቤተክርስቲያን  ከስብከተ ወንጌል የበለጠ ሌላ ሥራ የላትም  ይህንን ትረዱን  እንፈልጋለን በማለት እነዚህንና በአንዳንድ ወቅታዊ ጉዳዮች ላይ በጥልቀት አበክረው የተናገሩ ሲሆን በተለይም ደግሞ የስብከተ ወንገል መስፋፋት፤ የቤተክርስቲያን ህልውናና ክብር እንዲሁም  የቤተክርስቲያን ህብረት ከመልእክቶቻቸው  መካከል ዋና ዋናዎቹ ነበሩ፤  ከዚህ ጋር ተያይዞም ቤተ ክርስቲያን የአማኞች ሕብረትና በክርስቶስ ደም የተመሰረተች ናት በማለት ንግግራቸውን የጀመሩት ቅዱስነታቸው የስብከተ ወንጌል መስፋፋት ደግሞ የቤተክርስቲያን ህልውና ነው በማለት አክለውበታል፡፡በተጨማሪም  በአዲስ አበባ የሚኖሩ ሰባክያነ ወንጌል  የአገልጋይ እጥረት  ወዳለባቸው ገጠር አብያተ ክርስቲያናት እየተጓዙ የቤተክርስቲያን ህልውና የሆነውን ወንጌልን እንዲያስፋፉ የመፍትሔ ሃሳብ ሰንዝረዋል፡ ጥሪያቸውም አስተላልፈዋል፡፡በሚድያ በኩልም ቤተክርስቲያን የጀመረችውን የሚዲያ  ስራ ከዚህ በበለጠ መልኩ ጠንክራ ትሰራ  ዘንድ ይገባል በማለትና  አገልጋዮችም ሥራው የራሳቸው እንደሆነ ተገንዝበው የበኩላቸውን እንዲወጡ ሙያዊ ድጋፍ እንዲያደረጉና  ታዛዥነታቸውን እንዲገልጹ አባታዊ መመሪያ ሰጥተዋል፡ በማከልም ሰው አስተውሎ ሲናገር ይመሰገናል ነገር ግን ተናግሮ የሚያናግር ደግሞ ተናጋሪ ቢያሰኝም በአደባባይ የተነገረ ስህተት በአደባባይ ሊታረም ይገባዋል ካሉ በኋል በጉባኤው ተገቢ ያልሆነ ቃል ተናግረዋል ያሉዋቸውን አንድ ሊቀ-ጳጳስ በአጽንኦት ገስጸዋል፡፡በመጨረሻም የሽልማት ኮሚቴ ባዘጋጀው የውድድር ነጥብ መስጫ ሃሳቦች መሰረት በአስር ምድብ በመከፋፈል ከየምድቡም ከአንድ እስከ ሶስት ለወጡት አህጉረ ስብከቶች ሽልማትና ሰርተፊኬት   ተበርክቷል፡፡የአዲስ አበባ ሃገረ-ስብከትም ፈር ቀዳጅነቱን በአደባባይ አስመስክሯል፡፡
በአጠቃላይ 36ኛው አጠቃላይ ሰበካ መንፈሳዊ ጉባኤ በቅዱስነታቸው ጸሎት ተጀምሮ ለ4 ተከታታይ ቀናት ፡በርካታ የቤተክርስቲያን ጉዳዮችን ሲመለከት ቆይቶ፡ለሚቀጥለው በጀተ ዓመትም ሊሰሩ የሚገቡ ዋና ዋና የቤተክርስቲያን ሥራዎችን በመዳሰስና መመሪያ በመስጠት እንዲሁም ቅዱስ ሲኖዶስ ሊመለከታቸው የሚገቡ ባለ ሃያ አንድ ነጥብ  የአቋም መግለጫ አውጥቶ በቅዱስነታቸው ጸሎትና አባታዊ መመሪያ፤እንዲሁም በጠቅላይ ቤተክህነት እራት ጋባዥነት ተጠናቋል፡፡ 
ወስብሐት ለእግዚአብሔር ፡፡

 
አንጋፋው የአዲስ አበባ ሀገረ-ስብከት የ2009 ዓ/ም የሥራ አፈጻጸም ሪፖርቱን ለ36ኛው አጠቃላይ ሰበካ መንፈሳዊ ጉባኤ አቀረበ

                                                                በመ/ር ሽፈራው እንደሻው(የሀገረ ስብከቱ ሚዲያ ክፍል ሪፖርተር)

640

የ36ኛው አጠቃላይ መንፈሳዊ ጉባኤ ጥቅምት 06/2010 ዓ/ም ቅዱስ ፓትሪያርኩ፡ብጹአን ሊቃነ-ጳጳሳት ፤የየመምሪያውና የድርጅት ኃላፊዎች፡የየአህጉረ-ስብከቶች ስራ አስኪያጆችና ልዑካን እንዲሁም በአዲስ አበባ ሀገረ-ስብከት ስር የሚተዳደሩ አድባራትና ገዳማት አስተዳዳሪዎችና ምክትል ሊቃነ መናብርት በተገኙ በት የሚቀርበው ዓመታዊ ሪፖርት የተሰማበትና ስለሚቀጥለው የ2010 በጀት ዓመት እቅድ የተደመጠበት የ3ኛው ቀን ውሎ እንሆ ብለናል፡፡
የሶስተኛው ጠቅላላ መንፈሳዊ ጉባኤ በብጹእ ወቀዱስ አባታችን ጸሎት ከተጀመረ በኋላ  በካናዳ ሀገረስብከት ብጹእ አቡነ ማትያስ ትምህርተ ወንጌል ተስጥቷል፡፡ በመቀጠልም የስድስት አህጉረ -ስብከቶች ዓመታዊ የስራ አፈጻጸም ሪፖርት ከቀረበ በኃላ አናጋፋውና የጠቅላይ ቤተክህነት የጀርባ አጥንት እንደሆነ የሚታወቀው የብፁእ ወቅዱስ ፓትሪያርኩ ልዩ  ሀገረ ስብከት የሆነው የአዲስ አበባ ሀገረ ስብከት በታላቅ ጭብጨባና የሞራል ድጋፍ በመታጀብ የ2009 ዓ/ም  ዓመታዊ የሥራ አፋጻጸም ሪፖርቱን በክቡር መምህር ጎይቶም ያይኑ የሀገረ ስብከቱ ዋና ስራ አስኪያጁ  አማካኝነት አጠቃላይ ሪፖርቱ ቀርቧል፡፡
በሪፖርቱ እንደተገለጸው የሀገረ ስብከቱ ጽ/ቤት የዓመቱ የስራ አፈጻጸም ዘመን ከሌሎቹ የስራ ዘመናት በተለየ መልኩ ከፍተኛ የሚባል የስራ ክንውን የተፈጸመበት ዘመን ነው፡፡በበጀት ዓመቱ ሃገረ-ስብከቱ ያከናወናቸው ዋና ዋና የሥራና የአገልግሎት ተግባራት መካከል የተወሰኑትን እንመለከታለን፡፡
መልካም አስተዳደርን በተመለከተ፡-በዚህ አገላለጽ መልካም አሰተዳደር ማለት በየትኛውም የቤተክርስቲያኒቱ አገልግሎት ዘርፍ ላይ ለተቀመጡ አገልጋዮች እንዲሁም በሃገረ-ስብከቱ ስር ለሚኖሩ ምእመናን የሚገባውን ክብር በመስጠትና ለሚፈጠሩት ችግሮች አፋጣኝ የመፍትሔ እርምጃ በመስጠት ፍትህን ማስፈን ማለት ነው፡፡አዲስ አበባ ሃገረ ስብከትም በስሩ የሚየስተዳድራቸው ገዳማትና  አድባራት በመኖራቸው በእነዚህ አድባራትና ገዳማት የሥራ ኃላፊዎች በሚፈጠራው የአሰራር ክፍተት የተነሳ በርካታ አቤቱታ  አቅራቢዎች የሃገረ-ስብከቱን ጽ/ቤት እንደመስከረም ንብ ወረውና አቤቱታ በማሰማት ለጽ/ቤቱ ተጨማሪ ስራና ችግር  ሆነው ቆይተው እንደነበር ይታወቃል፡፡ሆኖም ግን በሃገር-ስብከቱ ጠንካራ የአስተዳደር ጉባኤ መሰረት ችግሩ የተፈጠረበት ቦታ ድረስ በመሄድ የችግሩን መንስኤ በማጣራት የችግሩ አቀንቃኝ በሆኑ አካላት ላይ የማያዳግም አስተዳድራዊ እርምጃ ወስዷል ለአድባራትና ለገዳማቱም ከፍተኛ ሰላምና መረጋጋትን አስፍኗል፡፡በመቀጠልም ድጋሚ እንደዚህ ዓይነት ችግሮች እንዳይፈጠሩ የአቅም ግንባታና የአገልጋይነት ስነ-ምግባር ስልጠናዎችን በሚገባ መስጠቱን ገልጧል፡፡ከዚህም ባሻገር ሁሉም አድባራትና ገዳማት በበጀት ዓመቱ መጨረሻ የተጓዙበትን የጉዞ መስመር ወደኋላ መለስ ብለው እንዲመለከቱና እንዲፈትሹ ጠንካራና ደካማ ጎናቸውንም በመገምገም ለቀጣይ የሥራ ዘመን የመፍትሔ አቅጣጫዎችን የሚነድፉበት መድረክም አዘጋጅቷል፡፡ እንደዚህ አይነቱ አስራር ወይም ውይይት በሃገረ-ስብከታችን ብሎም በቤተክርስቲያናችን ከአሁን በፊት በሰፊው ያልታየና ያልተተገበረ ቢሆንም ጽ/ቤታችን ግን በክቡር ስራ አስኪያጁ መምህር ጎይቶኦም ያይኑ  ሃሰብ አመንጭነትና መመሪያ ሰጭነት በሰባቱም ክፍለ ከተሞች ከአስተዳዳሪዎች እስከ ዲያቆናት ድረስ የዘለቀ የግምገማና የውይይት ፕሮግራም ተደርጓል፡፡ከዚህም የተነሳ ከበርካታ አስተዳዳደሪዎችና አገልጋዮች እንደሁም በየጊዜው የሀገረ-ስብከቱን የአሰራር ለውጥ በሚከታተሉ ቀናዒ የቤተክርስቲያን ልጆች ምስጋና ለጽ/ቤቱ ተችሮታል፡፡
የፐርሰንት አሰባሰብ ሂደት፡- የፐርስት አሰባሰብ ከአማንያን የአስራት በኩራትና በቤተክርስቲያን ከሚሰበሰቡ ልዩ ልዩ ገቢዎች ሀገረ ስብከቱ የሚገኘው ከመቶ ሃያ ፐርሰት ሲሆን የዚህ የፐርሰት አሰባሰብ ከሌሎች ዓመታት ልዩ የሚያደርገው በሀገረ ስብከቱ የየክፍሉ ኃላፊዎች አስተባባሪነት ሰባቱም ክፍለ ከተሞች በእጅጉ በመድከም ከ1992 ዓ/ም ጀምሮ አስከ 2008 ዓም ያልተከፈሉ አንዳንድ ውዝፍ ፐርሰት በተደረገው እንቅስቃሴ አስደናቂ ውጤት ተገኝቷል፡፡ይኸውም የአድባራቱና የገዳማቱ ዓመታዊ ገቢ ከሚሊዮን ወደ ቢሊዮን የተሸጋገረበትና የሀገረ ስብከቱ ድርሻ በ55 ፐርስት  እድገት አሳይቶ 202,304 593.60 መሰብሰብ ተችሏል፡፡ክቡር ስራ አስኪያጁ አበክረው እንደተናገሩት ውዝፍ የሚለው ቃል ስመ አጠራሩ እንዲጠፋና ወደፊትም ከዚህ በተሻለ መልኩ ሃገረ ስብከቱ ማግኘት ያለበትን የፐርሰት ገቢ በወቅቱ እንደሚሰበስብ ቃል በመግባት ሀገረ ስብከቱ ቆርጦ ተነስቷል ብለዋል ፡፡ የበጀት ዓመቱ የፐርሰት አሰባሰብ ካለፈው ዓመት ጋር ሲነጻጸር 55,593,805 ልዩነት አምጥቷል ፡፡ለመንበረ ፓትሪያርኩም 35,104,279.42 በማስገባት ከፍተኛ እድገት አስመዝግቧል፡፡ለዚህም ነው ታሪካዊ የበጀት ዓመት የሚል ስያሜ የተሰጠው ፡፡በዐዋጅ ነጋሪ ገጽ 17 በኦዲትና እንስፔክሽን መምሪያ የቀረበው የኦዲት ውጤትና በጠቅላይ ቤተክህት ብጹዕ ዋና ሰራ አስኪያጁ ሪፖርት የተደመጠው  የአዲስ አበባ ሀገረ ስብከት የ2009 ዓ/ም የበጀት ሪፖርት ሳይሆን ከ2007-2008 ዓ/ም መሆኑንና የ2009 ዓ/ም የኦዲት ውጤት ምንም ዓይነት ስህተትም ይሁን ግድፈት ያልተገኘበት በመሆኑ በኦዲትና እንስፔክሽን ቁጥጥር መምሪያው፤ በብጹእ ዋና ስራ አስኪያጁና በሃገረ ስብከቱ ዋና ስራ አስኪያጅ በድጋሚ ተስተባብሎ በጉባኤው ፊት  እንዲስተካከል ተደርጓል፡፡ 
ስልጠናና ዓውደ ጥናት፡-እንኳን በአንድ ተቋም ውስጥ ለሚሰሩ ሰራተኞችና አገልጋዮች ይቅርና በግለሰብ ደረጃም ቢሆን የአመለካከትና የአስተሳሰብን አቅም ከፍ ለማድረግና አዳዲስ ስራዎችን ለመገንዘብ የሚጠቅም ሁነኛ መፍትሔ መሆኑ ግልጽ ነው፡፡ይህንን ሃሳብ በጥልቅ የተረዳው የአዲስ አበባ ሃገረ ስብከት ጽ/ቤት የሃገረ ስብከቱን አሰራር ለማዘመንና ለማስተካከል በገንዘብ አያያዝ ወይም (double entry) የህግ ጉዳዮችን፤የመልካም አስተዳደርንና ኦርቶዶክሳዊ አስተምህሮን በተመለከተ እና በመሳሰሉት  የተለያዩ  ርአሰ ጉዳዩች ዙሪያ ለ5 ተከታታይ ቀናት  ስልጠናና ዓውደ ጥናትን በሚመለከታቸው አካላት እንዲስጥ አድርጓል፡፡ በዓውደ ጥናቱም መጨረሻ ቀን ብጹእ ወቅዱስ ፓትሪያርኩ  እንደዚህ ዓይነት ስልጠናዎችና ዓውደ ጥናቶች መቀጠል እንዳለባቸው አበክረው ተናግረዋል አባታዊ መመሪያም አስተላልፈዋል፡፡
ንብረትንና አጠባበቁ፡-  ከአሁን በፊት እንደምናውቀው በርካታ አድባራትና ገዳማት ቋሚና ተንቀሳቃሽ የነበሩ ንብረቶችን በመጠበቅና በመንከባከብ እንብዛም አጥጋቢ አልነበሩም፡፡የዚህም ግዴለሽነት አመለካከት ከሙዳዬ ምጽዋት ያልዘለለ ገቢ እንዳይገኝ አድርጓል ቤተክርስቲያንም በድሏል፡፡በ2009 ዓ/ም የበጀት ዓመት ግን ከአሁን በፊት የነበረውን የቸልተኝነት አሰራር በመቀየር በክቡር ስራ አስኪያጁ መሪነትና የሀገረ ስብከቱ አስተዳደር ጉባኤ አባላት ተባባሪነት የመስክ ጉብኝት በማድረግ አልፎ አልፎም ልዑካንን በመላክ በአንዳንድ አጥቢያ አብያተ ክርስቲያናት ያለውን የንብረት አጠባበቅና የልማት እንቅስቃሴ ማለትም የቦታና የሱቅ ኪራዮች የወቅቱን ገበያ በተመለከተ እንዲከራዩ የኪራዩን ዘመን ለአንድ ዓመት ብቻ እንዲፈጸምና እንደሁኔታው የሚታደስ እንዲሆንና ግልጽ የሆነ ጨረታ በማውጣት የሀገረ ሰብከቱና የክፍለ ከተማ ተወካዮች በተገኙበት እንዲፈጸም ተደርጓል፡፡ በማያያዝም ከቤተክርስቲያን ጥቅም ይልቅ የግል ጥቅማቸውን የሚያስቀድሙ ጥቅመኞች ላይ የማዳግም አስተዳደራዊ እርምጃ ወስዷል፡፡በተጨማሪም ይዞታነቱ በቤተክርስቲያን እጅ ሆኖ ነገር ግን በካርታና ፕላኑ ላይ ያልተካተተ በርካታ የቤክርስቲያንን ንብረት ከሚመለከታቸው የመንግስት አካላት ጋር በመሆን ሀገረ ስብከቱ ለ25 አብያተ ክርስቲያናት መፍትሔ ስጥቷል በሀገረ ስብከቱ ህንጻ ላይ  ለሁለት ዓመታት ያክል  ተከራይቶ የኪራይ ገንዘብ ሳይከፍ የቆየው የባሮክ ዲያግኖስቲክ ላብራቶሪ በዚሁ በጀተ-ዓመት ከግማሽ ሚሊዮን  ብር በላይ ገቢ አድርጓል፡፡
በሰባቱ ክፍላተ ከተሞች የተደረገ ዓመታዊ ውይይት
የአዲስ አበባ ሀገረ ስብከት በስሩ ሰባት ክፍላተ ከተማ ያሉት ሰፊ ሀገረ ስብከት ሲሆን  ከእነርሱ ጋር በመናበብና ያጋጠሙ ችግሮችንም በጋራ በመወያየት ማእከላዊ የፋይናንስ ሥርዓት እንዲዘረጋ የስብከተ ወንጌል አገልግሎት እንዲጠናከር መልካም አስተዳደር በቤተክርስቲያናችን እንዲስፋፋና ሰበካ ጉባኤውም እንዲጠናከር በማድረግ የ2009 ዓ/ም የበጀት ዓመት ለውጥ ያመጣና ለቤተክርስቲያናችንም ሁለንተናዊ እድገት ያስመዘገበ ወቅት መሆኑን ከሪፖርቱ ተደምጧል፡፡
በሀገረ ስብከቱ ጽ/ቤት የተደረገ የሥራ አፈጻጸም ግምገማ፡- በየትኛውም ተቋምና ድርጅታዊ አሰራር በተወሰኑ የጊዜ ክፍልፋዮችና የዓመቱን መጨረሻ የሥራ አፈጻጸምን አስመልክቶ ግምግማ ይደረጋል ፡፡በግምገማው ውስጥ ጠንካራ ጎናቸው ከፍተኛውን ጣሪያ ለነኩ ሰዎች ሽልማት ሲጎናጸፉ ዓመቱን በውጤት አልባነት ላሳለፉት ደግሞ  ተግሳጽና ተሻሻል የሚል ተቋማዊ ሃሳብ ይሰነዘርባቸዋል፡፡የአዲስ አበባ ሀገረ ስብከት ጽ/ቤትም የቤተክርስቲያኒቱ አንጋፋ ተቋም እንደመሆኑ መጠን የሥራ ዘመኑን አስመልክቶ የግምገማ መድረክ አዘጋጅቷል፡፡ በግምገማው ላይ አመርቂ ውጤት ላስመዘገቡ የክፍለ ከተማ ኃላፊዎች ምስጋና ሲቸራቸው በተለያየ መልኩ የተጣለበቸውን አደራ ችላ ያሉትን ደግሞ እንዲያሻሽሉና በትጋት እንዲያገለግሉ ጠንካራ ማሳሰቢያ ተሰጥቷቸዋል፡፡በግምገማው ወቅት ክቡር ሥራ አስኪያጁ እንደተናገሩት ከዕለት ወደ ዕለት የአማንያን ቁጥር እየቀነሰ በመምጣቱና አስጊ በመሆኑ የስብከተ ወንጌል አገልግሎት በእጅጉ ሊስፋፋ እንደሚገባ አሳስበዋል፡፡እንዲሁም ሌሎችና ተመሳሳይ ችግሮችን በማንሳትና በመወያየት ከእልባት ላይ ተደርሷል፡፡
ልዩ ልዩ ክንዋኔዎችን አስመልክቶ
በመብራት መጥፋት የተነሳ በሀገረ ስብከቱ ውስጥ የስራ መቆራረጥ እንዳይከሰትና  ከህንጻው ዲዛይን ጋር የሚመጣጠን አውቶማቲክ ድምጽ አልባ ጀኔሬተር ተግዝቷል፡ቤተክርስቲያናችን የገንዘብ አያያዝ ሥርዓቷን ለማዘመንና የባንክ አክስዮን ባለድርሻ እንድትሆን ቅዱስ ፓተሪያርኩና ብጹዓን አባቶች በሰጡት ፈቃድ መስረት ዳሎል በተሰኘው ባንክ የመሰራችነት ቅድሚያውን ቤተክርስቲያን ስለተጋራች የሃገረ-ስብከቱ ጽ/ቤት የ25 ሚሊዮን የአክስዮን ድርሻ በመግዛትና እንዲሁም አድባራቱና ገዳማቱ እንዲሳተፉ ከሚገኛውም የአክስዮን ትርፍ ተቋዳሾች እንዲሆኑ፤ከፍተኛ ጥረት አድርጓል እያደረገም ይገኛል፡፡ከዚህም  በተጨማሪ  የአገልጋዮችን መብት ለማስከበር ከጡረታ ክፍያ ጋር የተያያዘ ሥርዓት ለመዘርጋት የአዲስ አበባ ሃገረ-ስብከት ጽ/ቤት የጡረታ የአከፋፈል ደንብ በባለሙያ በማስጠናት የጥናቱንም ውጤት ለአድባራትና ገዳማት በማቅረብ የእነርሱን አዎንታዊ ምላሽ ካዳመጠ በኋል  በሙሉ ድምጽ የጸደቀውን ይህን የጡረታ አከፋፈል ደንብ በ2010 የበጀት ዓመት በሃገረ ስብከቱ ራሱን የቻለ የባንክ ሂሳብና ዘርፉን የሚያስተባብር የጡረታና ሪከርድ ክፍል ተከፍቶ ወደ ትግበራ ለመግባት በዝግጅት ላይ የሚገኝ መሆኑንም ተገልጸዋል፡፡ የቤተክርስቲያን ተቀዳሚ ተግባር  የስብከተ ወንጌል ማስፋፋትና ሰዎችን ወደጌታ ማምጣት ቢሆንም ተጓዳኝ በሆነ መልኩም የተቸገሩትን የመርዳት፡አዳዲስ ለሚቋቋሙም የመቋቋሚያ ድጋፍ የማድረግ መለኮታዊ አደራ እየተወጣች ትገኛለች የአዲስ አበባ ሀገረ ስብከትም የቤተክርስቲያን አካል በመሆኑ ባለፈው የበጀት ዓመት ለደቡብ ኦሞ ሀገረ ስብከት ከፍተኛ የገንዘብና የአገልጋዮች ድጋፍ፡ ለገጠር አብያተ ክርስቲናት  አብነት ተማሪዎች የድጎማ ገንዘብና የመሳሰሉትን በመለገስ የቤተክርስቲያንን ሥራ በእጅጉ በመጋራት ላይ ይገኛል ወደፊትም በዚሁ መልክ ይቀጥላል፡፡
በ2010 በጀተ-ዓመት ሊሰሩ የታሰቡ ዋና ዋና የሀገረ ስብከቱ  እቅዶች
በ36ኛው አጠቃላይ መንፈሳዊ ጉባኤ ዋዜማ ከህትመት የወጣውንና ለአራተኛ ጊዜ ተሻሽሎ የቀረበውን አዲሱን ቃለ ዐዋዲ አስመልከቶ ግንዛቤ ማበስጨበጫ መስጠት፡በተለያዩ የአገልግሎት ዘርፎች ተሰማርተው ለሚገኙ የሃገረ ስብከቱና የክፍለ ከተማ ሰራተኞች እንዲሁም የአድባራትና ገዳማት አስተዳዳሪዎችና አገልጋዮች ለሙያው መሻሻል ይጠቅም ዘንድ የአቅም ግንባታ መስጠት፡ለሁሉም አገልጋዮች በሚባል መልኩ የጡረታ ዋስትና  ማረጋገጥ፡ የ2010 የቤተክርስቲያናችንን ገቢ ሰላሳ ፐርሰት ማሳደግ ፡ቤተክርስቲያን ከልመናና ከሙዳዬ ምጽዋት ወጥታ የራሷ የሆነ ገቢ ያስፈልጋታልና የገቢ ማስገኛ ሁለገብ ህንጻዎች  እንዲፋጠኑ ማድረግና አዳዲስ የልማት አውታሮችን መዘረጋት በድጋፍ ረገድም ለገጠር አብያተ ክርስቲያናት የቤተክርስቲያን ትምህርት ምንጭ እንዳይደርቅ 4 ሚሊዮን ብር ለመርዳት ዝግጅት ላይ መሆኑና እንዲሁም በቤተክርስቲያናችን ውስጥ ለሚደረጋው የሰንበቴ ማህበር የመተዳደሪያ ደንብ ማዘጋጀትና ልዩ ትኩረት ለሚስፈልጋቸው ለበጀት ዓመቱ የስራ ሂደቶች ወሳኝ እቅድ እንደሚያስልጋቸው በመግለጽና በሃገረ ስብከቱ ከፍተኛውን ድረሻ ከሚወስዱት ብጹእ ወቅዱስ ፓትርያሪኩ እስከ አድባራትና ገዳማት ያሉትን የሥራ ኃላፊዎቸና ባለድረሻ አካላት ለተሳካው የበጀት ዓመት በእግዚአብሔር ስም በማመስገንና በሚቀጥለው የበጀት ዓመት የቅዱስነታቸው ጸሎትና አባታዊ መመሪያ በመቀበል በጋራ ለመስራት ጥሪያቸውን አቅርበው ሪፖርታቸውን አጠናቀዋል፡፡
በአጠቃላይ የአዲስ አበባ ሀገረ ስብከት ጽ/ቤት የኢ/ኦ/ተ/ቤ/ክርስቲያን ካሏት አህጉረ ስብከቶች ስልጠናንና ዓውደ ጥናትን፤የንብረት አያያዝና ጥበቃን፡መልካም አስተዳደር ማስፈንን፡የፐርስት አሰባሰብን፤የዓመቱ የሥራ አፈጻጸም አስመልክቶ ዓመታዊ የሥራ ግምገማና የሰው ሃብት አስተዳደር ክንዋኔን በተመለከተ የተጣለበትን መንፈሳዊና ሓዋርያዊ እንዲሁም ማህበራዊ ኃላፊነት በብቃት በመወጣት የአንበሳውን ድርሻ የያዘ አንጋፋ ሃገረ ስብከት ነው፡፡በተጨማሪም በዓመታዊ ሪፖርት ላይ የተገለጸው እያንዳንዱ የሥራ አፈጻጸም ክናዋኔና የተመዘገቡ ውጤቶች በወረቀት ላይ ብቻ የተቀመጠ ሳይሆን በተግባር የሚታይ ሊለካና ሊሰፈር የሚችል በእውነትና በታማኝነት ላይ የተመሰረተ ዓመታዊ የሥራ አፈጻጸም ሪፖርት ነው፡፡በመሆኑም ይህንን በአይኑ ያያ ማንኛውም የቤተክርስቲያናችን ባለድርሻ አካላት አይዞህ በርታ የሚል የማበረታቻ የሞራል ድጋፍና ክፍተቶችን ሊያሳይ የሚችል ጠቃሚ ሃሳብ ይዞ በመምጣትና ከሃገረ ስብከታችን ጎን እንዲሰለፍና የያዝነውን በጀት ዓመት የሥኬትና የውጤት ይሆን ዘንድ በጸሎት ትረዱን ዘንድ ምኞታችን ነው፡፡    
ማሳሰቢያ
በአዋጅ ነጋሪ መጽሔት 10ኛ ዓመት ቁ 13 ገጽ17 ላይ ከኦዲትና ኢንስፔክሽን መምሪየ በመነሳት የቀረበውን ጹሑፍ በሚመለከት
1. የጠቅላይ ቤተ ክህነቱ ዋና ስራ አስኪያጁና ቁጥጥር መምሪያው በአዋጅ ነጋሪ መጽሔት 10ኛ ዓመት ቁ 13 ገጽ 17 ላይ የቀረበውን ሪፖርት ሁሉ ስህተት መሆኑን በገለፁት መሠረት ዘገባው የ2008 በጀት ዓመት እንጂ የ2009 በጀት ዓመት አለመሆኑ የ2008 በጀት ዓመት ኦዲት ሪፖርትም አስከአሁን ወደ ሀረ ስብከታችን ያልመጣ መሆኑ እንዲታወቅ 
2. ንብረትነቱ የሀገረ ስብከቱ የሆነ በሀገረ ስብከቱ ሕንፃ ሥር የሚገኘውን ቤት የተከራየ ባሮክ ዲያልኖስቲካል ላቮራቶሪ ከህዳር ወር 2007 ዓ.ም እስከ ህዳር ወር 2008 ዓ.ም የኪራይ የውል ስምምነት ፈጽሞ የ3 ወር ከከፈለ በኋላ አቋርጦና ተጨማሪ የውል ዕድል አግኝቶ  የ2 ዓመት ከሁለት ወራት ውዝፍ ኪራይ ብር 476,471.75 ባለመክፈሉ የሀገረ ስብከቱ ጽ/ቤት በየካቲት ወር 2008 ዓ.ም ውሉን በማቋረጥና ቤቱን በማሸግ በመደበኛ ፍ/ቤት ክስ አቅርቦ የነበረ ቢሆንም ከክርክር ይልቅ ከድርጅቱ ባለቤት ጋር በውይይት መጨረስ እንደሚሻል በማመን እልህ አስጨራሽ ውይይትና ክርክር ተደርጎ የነበረበትን ውዝፍ ኪራይ በሙሉ መጽሔቱ ላይ እንደተገለጸው የአንድ ዓመት ከ2 ወር እና ገንዘቡም መጽሔቱ ላይ እንደተገለጸው ሳይሆን የሁለት ዓመት ከ2 ወር ብር 476,471.75 ስለነበር በአግባቡ እንዲከፍል ተደርጎ በወቅቱ የቤተ ክርስቲያኒቱ ልሳን በሆነው ዜና ቤተ ክርስቲያን ጋዜጣ 63ኛ ዓመት ቁጥር 78 ጥርና የካቲት 2009 ዓ.ም እትም ላይ በሰፊው የተዘገበና በሪፖርትም የተገለጸ በመሆኑ በመጽሔቱ መካተት ከነበረበትም ይህ እውነታ ሊወጣ የገባ  ነበር፡፡
በአጠቃላይ ከሁለት ዓመታት በፊት  የተከፈለውን አበል እና መፍትሔ የተሰጠውን የቤት ኪራይ የ2009 ዓ.ም ድርጊት አስመስሎ ማቅረብ እጅግ አሳዛኝ በመሆኑ ለቤተ ክርስቲያን ታስቦ ከሆነም እውነቱን በማረጋገጥ አጥፊውን መቅጣት ቢቻል ሚዛናዊ  ይሆን ነበር፤በመሆኑም ምንም እንኳን ሪፖርቱ እስከአሁን ባይደርሰንም በሪፖርቱ መሠረት እንዲፈጸምና እውነቱ ከላይ የገለጽነው መሆኑንና አሁን ያለውን አመራር የማይመለከት መሆኑ እንዲታረምልንና አንባብያን በዚህ መልኩ እንዲረዱልን እናሳስባለን፡፡

 

 
በኢትዮጵያ ኦርቶዶክስ ተዋህዶ ቤተክርስቲያን 36ኛው ዓመታዊ አጠቃላይ ሰበካ መንፈሳዊ ጉባኤ ተጀመረ

230

በኢትዮጵያ ኦርቶዶክስ ተዋህዶ ቤተክርስቲያን የመንበረ ፓትሪያርክ አጠቃላይ ሰበካ መንፈሳዊ ጉባኤ  በየዓመቱ በጥቅምት ወር በሚካሔደው  አጠቃላይ ጉባኤ ለቅድስት ቤተ ክርስቲያን አገልግሎት የሚጠቅሙ መሠረታዊ ጉዳዮች ይዳሰሳሉ፡፡ የጠቅላይ ቤተ ክህነት ጽ/ቤትን ጨምሮ፣ በመላው ዓለም የሚገኙ አህጉረ ስብከት፣ የድርጅቶችና የመንፈሳዊያን ኮሌጆች  ሪፖርቶች  ቀርበው ይደመጣሉ፡፡በዘንድሮ  ዓመትም  አዲስ አበባ ሀገረ ስብከት ስመዘገበው ልዩ  እና ከፍተኛ የሥራ ውጤት ታጅቦ ዓመታዊ ስብሰባው ተጀምሯል፡፡ በስብሰባው ላይ ብፁዕ ወቅዱስ አቡነ ማትያስ ቀዳማዊ ፓትርያርክ ርዕሰ ሊቃነ ጳጳሳት ዘኢትዮጵያ ሊቀ ጳጳስ  ዘአክሱም ወዕጨጌ ዘመንበረ ተክለሃይማኖት ፤ ብፁዓን ሊቃነ-ጳጳሳት ፤ የአህጉረ ስብከት ልዑካን ፤ የመምሪያዎችና የድርጅት ኃላፊዎች፤ የአዲስ አበባ ሃገረ-ስብከት ሥራ -አስኪያጅ ፤ የአዲስ አበባ ገዳማትና አድባራት  አስተዳዳሪዎችና ምክትል የሰበካ ጉባኤ ሊቃነ መናብርት ፤በድምሩ 794 ታዳሚዎች  በተገኙበት በጠቅላይ ቤተ ክህነት የስብከተ ወንጌል አዳራሽ በብጹእ ወቅዱስ ፓትሪያርኩ አባታዊ ቡራኬና ጸሎት በይፋ  ተከፍቷል፡፡የአጠቃላይ ሰበካ መንፈሳዊ ጉባኤ በቅዱስ ፓትርያሪኩ ርእሰ መንበርነትና በብፁእ  ዋና ስራ- አስኪያጁ ምክትል ሰብሳቢነት የሚመራው ዓመታዊ ዓመታዊ ጉባኤው ሁሉም አህገረ ስብከቶችና ይልማት ድርጅቶች አጠቃላይ የስራ አፈጻጸም ክንውኖችና ያስመዘገቡትን የስራ ፍሬ እንዲሁም በስራ ላይ ያጋጠሟቸውን ተግዳሮቶችና የወሰዱትን የመፍትሔ እርምጃ   የሚያሰሙበት የመወያያ መንፈሳዊ  ጉባኤ ነው፡፡ የኢ/ኦ/ተ/ ቤተ-ክርስቲያን የራሷ የሆነ መዋቅራዊ አደረጃጀቷን ከዘረጋችበትና መተዳደሪያ ደንብና መመሪያዎቿን በስራ ላይ ካዋለችበት ከ3ኛው ፓትሪያርክ ከአቡነ ተክለሃይማኖት የፕትርክና ዘመን ጀምሮ መደበኛ በሆነ መልኩ  ሲካሄድ ቆይቶ  የዘንድሮው  ማለትም የ2010 ዓ/ም 36ኛው ዓመታዊ ዓብይ ጉባኤ መሆኑን ከቤተክርስቲያን የታሪክ መዛግብት እንረዳለን፡፡ በጉባኤው መክፈቻ ላይ  እንደተገለጸው የዘንድሮው አጠቃላይ ሰበካ መንፈሰዊ ጉባኤ ከሌሎቹ ልዩ የሚደርጉት ሁለት ዋና ዋና ነጥቦችን ለማስቀመጥ ተሞክሯል፡፡ እነዚህም፡-
1.በሐምሌ 9/2009 ዓ/ም የቤተክርስቲያንን ሐዋርያዊ ተልእኮ ለማፋጠን በፓትሪያርኩ አንብሮተ እድ የተሾሙት 15-ሊቃነ- ጳጳሳት በጉባኤው መገኘታቸውና
2.በ2004 ዓ/ም የቅዱስ ሲኖዶስ ምልአተ ጉባኤ ተሻሽሎ እንዲቀርብ ባጸደቀው መሰረት የቤተክርስቲያናችን  ባለ 66 አንቀጽ ቃለ-ዓዋዲ ወደ 67 አንቀጽ ከፍ በማለትና  በ120 ገጾች በመጠቃለል  ለ4ኛ ጊዜ ተሻሽሎና ተስተካክሎ ለጉባኤው የቀረበበት ወቅት በመሆኑ ጉባኤው ልዩ እንደሚያደርገው ተገልጿል፡፡
በመቀጠልም በአዲስ አበባ ሀገረ ስብከት ሥር በሚተዳደረው የማህደረ ስብሐት ልደታ ለማርያም ወጣት ሰንበት ተማሪዎች "ኢይትዓጸው አናቅጽኪ ክቡራት ዕንቁ መሠረትኪ ሰናይት ሰላማዊት ቤተክርስቲያን "በሚል የቤተክርስቲያንን ቀጣይ ህልውና ላይ  ተመስርተው የታዳሚውን ልብ በሚነካ መልኩ ያሬዳዊ ዝማሬ አቅርበዋል፡፡  ከቅዱስነታቸውም ቡራኬ ተቀብለዋል ፡፡ በዚሁ ጉባኤ ላይ ቅዱስ ፓትርያሪኩ "ጌታው በቤተሰቦቹ ላይ የሚሾመው ታማኝና መልካም አገልጋይ ማነው  ማቴ 24 ፤45 በሚል ርእስ ባስተላለፉት አባታዊ መልእክት በጌታ በቤተሰቡና በአገልጋዩ መካከል ያለው ግንኙነት አስተማማኝና እጅግ በጣም ጤናማ ሆኖ እንዲቀጥል የጌታ ጽኑ ፍላጎት ነው፡፡ ጌታ ጥንቃቄ ማድረግ የፈለገው አገልጋዩን መሾም ላይ  ነው፤ ምክንያቱም ለቤተሰቡ የተቃና  እድገትና ኑሮ ወሳኝ ሚና የሚጫወተው አገልጋዩ ነውና……ይህ አማናዊ የሆነ የወልደ እግዚአብሔር ክርስቶስ ትምህርት መልካምና ታማኝ የሆኑ ካህናት ምእመናንን  በመመገብ ረገድ ያላቸው ኃላፊነት ምን ያክል ታላቅ ጥንቃቄ የሚያስፈልገው እንደሆነ የሚያሳይ ነው፤ እንደ ጌታችን አስተምህሮ የምእመናን ህይወት መቃናትና አለመቃናት በካህናት እጅ የወደቀ ነው፤ በማያያዝም ልዩ ልዩ የቁጥር ዘገባዎችና መረጃዎች እንደሚያሳዩት በአሁኑ ጊዜ በመካከለኛውና በደቡብ የሃገራችን ክፍል የሚገኙ ምእመናን ምግብ /ቃለ-እግዚአብሔር/ ባለማግኘታቸው በተኩላዎች በከፍተኛ ደረጃ እየተነጠቁ መሆናቸውን መገንዘብ እንደሚገባ የጠቆሙት ቅዱስነታቸው እንደዚህ ያለው ክስተት ገዝፎ በሚታይበት በአሁኑ ወቅት የካህናት አገልግሎት በታማኝነትና በመልካም ሁኔታ እየተከናወነ ነው ብለን የምናስብ ከሆነ ሌላውን ሳይሆን ራስን ማታለል ነው የሚሆነው ብለዋል፡፡በተጨማሪም ሁላችንም ውሉደ ክህነት ጌታችን በቤተሰቡ ላይ የሾመን ነንና ከተሰጡን መንጎች አንድ ስንኳ እንዳይጠፋ ሥርዓተ-ቤተክርስቲያንን ማዕከል አድርገን በተሳሳተ መንገድ እየተጓዙ ቤተክርስቲያንን ለመከፋፈል  የሚከጅሉ ልጆቻችንን አንድ ላይ ሆነን ተው፤ንስሐ ግቡ፤ታዘዙ፤የቤተክርስቲያንን አንድነትና ሥርዓት ጠብቃችሁ በአበው እግር ዋሉ እንበላቸው በማለት አባታዊ መመሪያ የሰጡት ቅዱስነታቸው ይህ ሲሆን መልካምና ታማኝ እረኛ መሆናችንን እናረጋግጣለን በማለት ገልጸዋል "፡፡ ከቅዱስነታቸው መልእክት እንደምንረዳው በእግዚአብሔር፤በአገልጋዩና በቤተሰቡ መካከል ያለው  የሶስትዮሽ መስተጋብራዊ ግንኙነት ጤናማ እንዲሆን ከፍተኛ ጥናቃቄ የሚደረገው የአገልገይ አመራረጥ ሂደት ላይ ነው፡፡አገልጋዩ ጤናማ ከሆነ የጌታ ቤተሰብ ጤናማ መንፈሳዊ ህይወትና ጤናማ ማህበራዊ ግንኙነት ይኖረዋል፤የአገልጋዩ ስነ-ምግባር በተቃራኒው ከሆናና በቤተክርስቲያን ያልተስተካከለ የአገልጋይነት ሥነ-ምግባር ካለ የመሪውና የተመሪው፤የጌታና የቤተሰቡ ግንኙነት በጣም የቀዘቀዘ፤ለመበጠስም የቀረበ መሆኑ የማያጠያይቅ የአደባባይ ምስጢር ነው፡፡ አሁን ባለንበት ዘመን የቤተክርስቲያንን የመገለጥ መሰረታዊ ዓላማ በአግባቡ ለመረዳትና ተልእኮውንም ለማስቀጠል ኢየሱስ ክርስቶስ ለሐዋርያት የስጠውን መለኮታዊ ኃላፊነት በማስታወስና ለቃሉም በመገዛት ታማኝ አገልጋዮች  ሆነን  ካልተገኘን  መክሊቱን እንደቀበረው ባላደራ ተወቃሾች መሆናችን አይቀሬ ነው፡፡ይልቁንም ከተወቃሽነት  ለመዳንና  ከጌታ የአገልግሎት ሽልማትና ምስጋናን ለማግኘት ታማኝ አገልጋይ ሆኖ መገኘት አማራጭ የሌለው ሁነኛ መፍትሔ ነው፡፡ ጠቅለል ባለ መልኩ  ከዚህ መልእክት ታማኝ አገልጋይ ማለት ምን ማለት እንደሆነ፤የታማኝ አገልጋይና ታማኝነቱን ያጎደለ አገልጋይ መገለጫዊ ባህርያት ምን ምን መሆናቸውን በሚገባ እንገነዘባለን፡፡
ከቅዱስ ፓትሪያርኩ መልእክትና አባታዊ ትምህርት  በማስከተልም የጠቅላይ ቤተክህነት  ስራ አስኪያጅ  ብፁእ አቡነ ዲዮስቆሮስ  ቤተክርስቲያን በተሰጣት አደራ መሰረት በ2009 ዓ/ም ያከናወነቻቸውን ዋና ዋና ተግባራት ማለትም የጠቅላይ ቤተክህነት የመምሪያዎች፤ የድርጅቶችና የቤተክርስቲያኒቱ ተልእኮ ማስፈጸሚያ መንፈሳዊ ኮሌጆች  ያስመዘገቡትን ጠንካራና ደካማ ጎን በአጠቃላይ ሪፖርት በማካተትና የ2010 ዓ/ም በጀት ዓመት አቅድ በማሰማት ከስዓት በፊት የነበረው የስብሰባ መርሃ ግብር ተጠናቋል፡፡ከምሳ ስዓት  በኋላ በነበረው ቆይታም የአክሱም፤የሲዳማ፡የሰሜን ጎንደር፡ የሰሜን ሽዋ ሰላሌ፡ የጅማ ዞን፡የመቀሌ፡የኢሊባቡር፡የድሬዳዋ፡የጋሞጎፋ፡የሰሜን-ወሎ፡የባሌና የምስራቅ ሐረርጌ በድምሩ አስራ ሁለት  አህጉረ -ስብከቶች  ተራቸውን መሰረት በማድረግ የ2009 ዓ/ም ዓመታዊ ሪፖርትና  በሚቀጥለው የሥራ ዘመን የቅዱስ ሲኖዶስን መመሪያ በመቀበልና በመተግበር ሊያከናውኑት ያቀዱትን እቅድ በማሰማት የመጀመሪያው ቀን የጉባኤ መርሃ ግብር  በዚህ መልኩ ተጠናቋል፡፡በሚቀጥሉት የጉባኤ ቀናት የሚከናወኑትን ክንውኖችና ውይይቶች እየተከታተልን የምንዘግብ መሆኑን ከወዲሁ እናስታውቃለን፡፡  
ወስብሐት ለእግዚአብሔር

 

 
<< ጀምር < ወደኋላ 1 2 3 4 5 6 7 8 9 10 ወደፊት > መጨረሻ >>

ገጽ 1 ከ 104

አድራሻ

አዲስ አበባ ፤ ኢትዮጵያ

ኢ-ሜይል: aadioces@gmail.com

ድረ ገጹ ውስጥ ይፈልጉ

ሀሳበ ባሕር(የዘመን ቁጥር)

ባሕረ ሐሳብ የዘመን መቁጠሪያ

ግጻዌ